Сумар дня на 8. червця/юнія 2021 р.

Приносиме вам сумар медияльной ґрупы ЛЕМ.фм+ на ден 8. червця/юнія 2021 р.

В Мысцовій одкрыто капличку Божой Матери Річной

В неділю, 6. червця/юнія, в Мысцовій прошло одкрытя капличкы Божой Матери Річной – опікункы Мысцовой. Капличка возникла як охорона околичных сел перед створіньом штучного резервуару Конты-Мысцова. Одкрытя нового обєкту прошло разом з пленеровом подійом проти будові резервуару, орґанізуваном Фундацийом Greenmind, Товариством для Землі і Сестрами Рікы. Ікону до капличкы зрыхтувала Марта Ямруґ, артистка і активістка з Ясла, яка в своіх працах часто односит ся до темы прав звірят і охороны середовиска. В часі подіі дискутувано ідею будовы штучного резервуару і наслідств, якы може за собом нести.

Думка на вакациі без нуды

Етноцентр Коросняньской Землі просит на вакацийны варштаты для діти. Орґанізаторы зрыхтували аж 8 тематичных турнусів, направленых на діти в віку од 6 до 14 років. Зачнут ся 6. липця/юлия і тырвати будут до 27. серпня/авґуста. Занятя проходити будут од віторка до пятниці і в залежности од турнусу тыкати будут зіля, плетіня, жытя на селі, ліса, леґенд, моды ци подорожуваня, а аж і еколоґіі. Каждый, хто хоче взяти участ в варштатах, мусит ся скорше записати і дати оплату. Чысло місц єст ограничене. Більше дрібниц та можливіст записаня ся находят ся на сайті Етноцентра.

Орґанізаторы фестівалю ім. Зиґмунта Гаупта в Ґорлицях просят о поміч

Зо взгляду на рішыня Міністерства Культуры, Нацийональной Спадковины і Спорту та Маршалківского Уряду не признати того рока дотациі на реализацию подіі, орґанізаторы нашли інчый спосіб на проведіня 7. уж едициі акциі. На портали zrzutka.pl ведут колекту, котра дозволит реализувати 5-дньову подію. Цілю єст зобрати 50 тис. зл. Фестіваль отримал уж дофінансуваня од ґорлицкой бібліотекы і уряду міста. Фінансову поміч заоферували тіж Чешскій Центр і Медженародный Центр Культуры в Кракові. Літературный фестіваль зачне ся 22. вересня/семтембра в Ґорлицкым Центрі Культуры. Проґрам подіі то найменше 20 акций, а як поінформували орґанізаторы, кєд поведе ся зобрати більше грошів, то проґрам збогатит ся о наступны стрічы. Вступ на фестіваль буде дармовый, а ціліст буде трансмітувана в інтернеті. На офіцийным сайті Фестівалю ім. Зиґмунта Гаупта находит ся список авторів, котры возмут участ в подіі, і мотузок до колекты.

Знад моря в горы на роверах

Тырват 6. едиция Креницкого Роверового Райду. 17-ох любителів біциґльовых подорожы з малопольской і поморской Крениці, в рамках туристичной промоциі та інтеґрациі обох самоурядів, підняло ся задачы переіхати понад 1200 км в 12 дни. Выстартували початком червця/юнія з Крениці Морской, а на Лемковині будут в неділю, 13. червця/юнія. Тогорічна траса райду веде через східню обшыр державы, вздолж границі з Росийом, Литвом, Білорусю і Украіном. Як і в попередніх роках, акция проходит під гослом «Крениця єст єдна, а міста сут два».