Емілиян Чырняньскій – ректор ЯУ (20.І.1824 – 4.V.1888)

Днес річниця народжыня великого Флоринчанина – Емілияна Чырняньского, лемківского хеміка, дослідника, професора і ректора Ягайлоньского Університету.

Емілиян Чырнянькій вродил ся 20. січня 1824 r. во Флоринці в хыжы грекокатолицкого священника Григория Чырняньского і Христины (з д. Канюк). По скінчыню сандецкой ґімназиі, хотіл остати священником – скінчыл теолоґічны курсы в Перемышли, а пак в 1844 р. зачал студиювати богословя на Львівскым Університеті. Тяжка хворота примусила го перервати науку во Львові, але вернул там в 1846 р., жебы зачати студиі на Технічній Академіі.

В 50. роках ХІХ ст. зачал наукову карєру на Ягайлоньскым Університеті. Там занимал ся хемійом і отримал званя найпере надзвычайного, а потім звычайного професора. В роках 1874-75 был ректором Ягайлоньского Університету.

Вмер 4. мая 1888 р. в Кракові. Похований єст на тамтышнім Раковицкым Цмонтері.