Сумар дня на 13. мая 2021 р.

Приносиме вам сумар медияльной ґрупы ЛЕМ.фм+ на ден 13. мая 2021 р.

Презентиация книжкы «Новелы, юморескы»

В чытальній сали Виноградівской Публичной Бібліотекы 23. квітня/апріля 2021 р. одбыла ся презентация книжкы «Новелы, юморескы» сучасного русиньского писателя Підкарпатя Александра Купаря (псевд. Александер Хуст). Акция реализувана была в рамках подіі святкуваня 218. річниці дня народжыня будителя Александра Духновича. Орґанізатором і модератором презентациі был Юрий Продан – голова Закарпатского Областного Науково-Культуролоґічного Общества ім. Духновича. Книжка «Новелы, юморескы» має дві части. В своіх творах прозаік Александер Купар сперат ся на власны складны жывотны скушености, і з іронійом, сарказмом і сатиром вказує людскє жытя. В плянях писателя є выдати по русиньскы специялистичну літературу, де буде ся описувало значыня стародавных деревяных храмів Підкарпатской Руси.

Продолжат спис на Словациі

По першым тыжни од початку асистуваного списуваня жытелів, з дньом 3. мая 2021 р., чысло списаных на Словациі збільшыло ся до 4 883 357 жытелів. За першый тыжден асистувано списало ся 39 500 люди. Тзв. асистуване списуваня жытелів на Словациі тырват шіст тыжнів і є продолжане в каждым місті і селі. Статистичный Уряд заохочат жытелів, жебы помогли свому селу або місту при реализациі асистуваного списуваня. До 13. червця/юнія можна зайти в контактове місце в своій місцевости або закликати до свойой хыжы рахмайстра. Актуально сут на териториі Словациі 3162 такы контактовы місця, де можна ся списати при помочы стацийонарных асистентів.

Коли будова вежы в Мощеници?

Знана є уж приближена дата, коли мала бы ся зачати будова видоковой вежы в Мощеници під Ґорлицями. Першый раз урядникы о плянах побудуваня видоковой вежы бесідували уж осіню мунилого рока. Вежа позваляла бы видіти гірскы пасма Татр з єдной страны і Бєщадів з другой. Покля што выдане было позволіня на будову обєкту, але дотепер ніт фінансовых середків на єй реализацию. Ґміна Мощениця інтенсивні глядат можливых джерел фінансуваня. Найвеце рахує на унійну підпору. Кєд поведе ся позыскати грошы, уж о пару місяців може зачати ся будова підґорлицкой видоковой вежы, яка буде наступным добрым туристичным пунктом на мапі ґорлицкого повіту.

Презентация русиністикы в Новым Саді

Як інформуют бачваньскы Русины, в пятницю, 14. мая, буде першый ден, коли на Філософічным Выділі Новосадского Університету буде ден одкрытых двери русиньской філолоґіі. Дальшый одкрытый ден русиністикы заплянуваный єст на 20. мая. Обі стрічы з огляду на ограничыня будут проходити онляйн. Русиньску філолоґію будут презентувати проф. Янко Рамач, проф. Михайло Фейса, Ана Римар Симунович і Александер Мудри. Орґанізаторы окдрытых двери русиністикы просят головно вшыткых заінтересуваных тогорічных матуристів. Дознати буде ся мож веце о того рода студиях, календари подаваня аплікаций і о проґрамі школіня.