Почас першого тыждня ся на Словакії асістовано списало майже 40 тісяч людей

По першім тыждню од зачатку асістованого списованя жытелів, 3-го мая 2021-го року, ся чісло списаных на Словакії підняло на 4 883 357 жытелів. За першый тыждень асістовано списало ся 39 500 людей.

Аґентуру TASR о тім інформовала говоркыня про Списованя жытелів, домів і квартелів 2021 Ясміна Штаудер.

„Першый тыждень спринимаме як вступ до асістованого списованя. Но треба собі усвідомити, же асістоване списованя тырвать шість тыжднів і є на каждім селі і місті, жебы в максімалній мірі інформовали жытелів о можливости асістовано списати ся,“ повіла ґенерална директорка секції соціалных штатістік і демоґрафі Штатістічного уряду Словацькой републікы Людмила Іванчікова.

Штатістічный уряд вызывать жытелів, жебы помогли свому селу або місту при реалізації асістованого списованя.

„Можуть до 13-го юна навщівити контактне місце у своїм селі або місті, або собі обїднати ку собі домів мобілного асістента,“ припомянула Штаудер з тым, же телефонічный контакт на обїднаваня мобілного асістентна собі кажде село публікує само.

Актуално є на теріторії Словацькой републікы 3162 контактных місць. Жытелі мають к діспозіції поміч од 3772 стаціонарьных асістентів, приготовленых є і 5013 мобілных асістентів. Асістоване списованя зачало 3-го мая, закінчіть ся по шестьох тыжднях, значіть 16-го юна.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА