Сумар дня на 11. мая 2021 р.

Приносиме вам сумар медияльной ґрупы ЛЕМ.фм+ на ден 11. мая 2021 р.

Округлый стіл на тему долі Карпаторусинів в 1. Окремій Чехословацкій Бриґаді Людвіка Свободы

Як поінформувал на своім фейсбуковым сайті Юрий Шыпович, голова орґанізациі Русиньскій Культуролоґічный Клюб, в минулу пятницю, 7. мая, в Центрі Культур Нацийональных Меншын Закарпатя в Ужгороді проходил округлый стіл на тему «Долі Карпаторусинів в складі Першой Окремой Чехословацкой Бриґады Людвіка Свободы: реалиі і інтерпретациі». Орґанізаторами были Народна Рада Русинів Закарпатя і Закарпатскє Областне Науково-Культуролоґічне Общество імени Александра Духновича. З рефератом на тему «Етнічный склад вояків чехословацкых збройных формувань в СССР (1939-1945 рр.)» выступил Павло Худіш. На тему «Підкарпатска Русь в істориі Чехословациі: документы і материялы» бесідувала Дияна Данко. Припомнийме, же в 1. Чехословацкым Армадным Корпусі ґенерала Людвіка Свободы другом найвекшом нацийональністю за чыслом вояків были по Чехах як раз Русины.

Дотациі для реґіонів в рамках Вызвы Мікропроґрам ПСК

Як інформувала Леа Геільова з Одділіня Комунікациі і Пропаґациі Пряшівского Самосправного Краю, 3. мая тр. схвалены были дотациі для реґіонів в рамках Вызвы Мікропроґрам Пряшівского Самосправного Краю. Депутаты рішыли підпорити 478 проєктів в проґрамах Спорт, Культура і Социяльны Службы в сумі 1,28 млн евро. Найвеце, бо понад 719 тис. евро было признане 286 проєктам в обшыри культуры. Фонды мают быти схоснуваны на будуваня, реконструкцию, модернізацию і утриманя культурных і сакральных памяток, як тіж на нематерияльну культурну дідовизну – орґанізацию культурных подій, підпору фольклорных колективів і ґруп ци выдавничу діяльніст.

Першый путівник по Сандеччыні

Сандеччына, котрой східня част входит в обшыр Лемковины, дождала ся першого туристичного путівника, якій выданый єст загальнопольскым выдавництвом. 5. мая 2021 р. был дньом премєры новой публикациі, автором якой єст Якуб Зиґмунт, спілпрацівник радия і порталю ЛЕМ.фм од 2017 р. Путівник выданый єст Выдавництвом Бездорожа, якого специялизацийом сут подорожничы книжкы та туристичны публикациі. Окрем інчого, в путівнику находит ся вельо інформаций звязаных з лемківскыма темами. Чытач дознат ся з него м.ін. про лемківскы церкви в долині Попраду і загальну історию Лемків в реґіоні. Путівник єст частю більшой сериі Travelbook, яка має на ціли вказати найважнійшы атракциі, підповісти, чого глядати поза головныма шляками, і ввести нас в світ місцевых звыків.

Гляданы творы передвоєнных ґорлицкых ремісників

Моніка Шнайдерман, писателька, головна редакторка Выдавництва Чарне, авторка многых публикаций, в тым «Порожнього Ліса» про лемківскє село Воловец, працує над новом книжком. Глядат предметів зробленых перед войном польскыма і жыдівскыма ґорлицкыма ремісниками, якы бы могла сфотоґрафувати і удокументувати. Кєд дахто іх має в своіх памятках, прошеный єст о контакт з авторком в сіти фейсбук або через майль Выдавництва Чарне.