Сумар дня на 10. мая 2021 р.

Приносиме вам сумар медияльной ґрупы ЛЕМ.фм+ на ден 10. мая 2021 р.

Пут «Великой Войны» – думка на упамятніня жертв і воєнных діянь в Карпатах

В Бєщадах і Низкым Бескіді возникне пут «Великой Войны» упамятняюча жертвы І світовой войны. Думкодавцьом єст др габ. Анджей Олейко, а проєкт єст реализуваный Реґіональном Дирекцийом Державных Лісів в Коросні при спілпрацы з істориками. Разом на пут зложыт ся 67 таблиц, котры упамятнят тисячы жертв, што згынули в часі воєнных діянь веденых в Карпатах. Таблиці найдут ся в місцях історичні важных і часто одвиджаных туристами. Пут проходила буде через девят надлісництв в Низкым Бескіді і Бєщадах. Таблиці з описами воєнных діянь поставлены будут в лісах перед літнім сезоном. Навязувати будут до істориі воєнных діянь на обшыри Карпат, особливо в періоді од 1914-1915 і 1918-1919. Найдут ся на них інформациі, знимкы і выімкы войсковых мап, жебы як найдокладійше вказати фронт в Карпатах. Додатково пут буде зрыхтувана для сліпых, на таблицях поміщены будут коды QR, котры дозволят слухати історичны інформациі.

«Священник полковник» – істория православного єґомостя з Лемковины  

В остатнім часі на каналі другым польской телевізиі одбыла ся премєра нового одтинка проґраму Екуменічной Редакциі пн. «Священник полковник». Геройом найновшого репортажу єст о. Мирослав Цідило, православный єґомость з лемківского села Бортне. 20-минутовый проґрам оповідат дорогу од підполковника звязаного з заграничном службом до каплана занимаючого ся пчолами і локальныма забытками. Репортаж можна обізріти на офіцийным сайті польской телевізиі.

Думка на цікавый біговый тренінґ в Низкым Бескіді

Гірскы Ґорлицкы Бігы орґанізуют бігову мініліґу «Перепаліня». Цілю конкурсу єст мотивувати спортовців до тренінґів в часі пандеміі. Орґанізаторы зрыхтували штырі трасы в західній страні Низкого Бескіду, три в ґміні Санкова і єдну в ґміні Устя Рускє. Трасы не сут ознакуваны як при традицийных змаганях, але головні ведут ознакуваныма пішыма путями. Першый етап проходил од 1. до 9. мая на Маґурі, наступный буде од 15.-23. в Корнутах, пак в Незнайовій і остатній на Лацковій. На сайті Гірскы Ґолрицкы Бігы находят ся інформациі тыкаючы оплат і способу переданя результатів.

В Ліґници на фасаді будинку KGHM ZANAM мож уж обзерати новый еколоґічный мураль

Проєкт дедикуваный єст працівникам і возник з нагоды 60-літя KGHM та 55-літя Zanam Legmet. Мураль занимат близко 190 м2 і вказує працівників спілкы, гутників, копальників, ґеолоґів, але тіж машыны і символы новой технолоґіі. Што цікаве, праца в цілости была намалювана мідю і єст то першый того рода мураль в Польщы.

Днес матура з лемківского языка

Зачынат ся наступный тыжден матуральных іспытів. Днес, згідні з гармоноґрамом, Центральна Еґзамінацийна Комісия дає можніст писати матуру з меншыновых і реґіонального языків, м.ін. лемківского і кашебского. Подібні як і минулого рока матуральный еґзамін з тых языків пройде лем в писемній формі.