Сумар дня на 7. мая 2021 р.

Приносиме вам сумар медияльной ґрупы ЛЕМ.фм+ на ден 7. мая 2021 р.

Русины в Міністерстві Заграничных Діл і Европейскых Справ СР

В середу, 5. мая, в Міністерстві Заграничных Діл і Европейскых Справ Словацкой Республикы прошла стріча державного секретаря ресорту дипломациі Інґрід Броцьковой, яка єст єдночасно членкыньом Рады Влады Словацкой Республикы про людскы права, нацийональны меншыны і родову рівніст, і дальшых робітників міністерства з представниками Русинів. Стріча выникнула на просьбу председы Округлого Стола Русинів Словациі Петра Штефаняка. Русинів репрезентували тіж Мілян Ян Піліп, підпредседа Выбору про нацийональны меншыны і етнічны ґрупы Рады Влады Словацкой Республикы про людскы права, нацийональны меншыны і родову рівніст, котрый є єдночасно і председом Уряду про Словаків жыючых заграницьом, та Петро Медвідь, член нацийонального выбору за Русинів і член порадного орґану з вопросів нацийональных меншын президенткы Словацкой Республикы Зузаны Чапутовой. Представникы Русинів бесідували м.ін. о істориі і сучасности русиньского народу ци успіхах і проблемах, якы стрічают Русинів на Словациі і в інчых державах. Присутны дискутували і про охорону людскых прав, правну державу ци поставліня меншын на Словациі і в дальшых державах Европы.

Послідні етапы будовы стежкы над Климківком

Працы при будові пути над Климківком неодолга мают быти завершены. Наступным етапом інвестициі, якым займе ся тепер Ґорлицкій Повіт, єст заґазувати одтинок активного зсуву ґрунту, якій ділит одтинкы стежкы. Зсув явил ся на граници Климківкы і Устя Руского пару років тому, што не дозволило выбудувати в тым місци полновыміровой пішо-біциґльовой трасы, такой як на дальшых одтинках. Можливым розвязаньом на тым одтинку єст будова стежкы типу крос/singletrack, яка бы найменше інґерувала в обшыр зсуву ґрунту.

Одкрыли Музей Дворы Карвациянів і Ґладышів

Як подали на інтернетовым сайті Повітового Староства в Ґорлицях, од вчера, 6. мая, одкрыты сут вшыткы одділіня Музею Дворы Карвациянів і Ґладышів. Одвиджаючы мусят тримати полный санітарный режім і не можут дотыкати обєктів і експонатів. Едукацийны занятя і варштаты будут орґанізуваны в меншых ґрупах. Детальны інформациі о чыслі осіб, якє може нараз быти в обєктах, і інчы ограничыня сут доступны на вебсайті ґорлицкого повіту.

Вертают змаганя в Х Ґорлицкым Спортовым Вельобою

По перерві спричыненій пандемійом коронавіруса і ограничынями, што з ньом звязаны, вертают змаганя в Х Ґорлицкым Спортовым Вельобою. В четвер, 13. мая, на стадийоні OSiR в Ґорлицях пройдут змаганя в цикльокросі. Терміны дальшых, перше наплянуваных змагань, якы ся не одбыли, будут поданы по тым, як зняты будут даякы пандемічны ограничыня.