Першый путівник по Сандеччыні уж доступный!

Сандеччына, котрой східня част входит в обшыр Лемковины, вкінци дождала ся першого туристичного путівника, якій выданый єст загальнопольскым выдавництвом. 5. мая 2021 р. был дньом премєры новой публикациі, яка описує тот прекрасный реґіон, а дале мало знаный так в Малопольщы, як і в цілій державі.

Автором книжкы єст Якуб Зиґмунт, спілпрацівник радия і порталю ЛЕМ.фм од 2017 р. Путівник выданый єст Выдавництвом Бездорожа (Bezdroża), якого специялизацийом сут подорожничы книжкы та туристичны публикациі.

Автор путівника вказує, же Сандеччына єст краіном полном маґічных закутин. Найдеме гев так сакральны забыткы, чудесны курорты, як і вельокультурову історию закляту в традициі, штуці і архітектурі. Медже горами Сандецкого Бескіду час плыне помалы, што дозвалят тішыти ся одпочынком на лоні природы.

Путівник по Сандеччыні єст комплетном книжком, яку можеме взяти в малу і велику подорож по тій краіні. Сут в ним записаны важны для каждого туристы практичны інформациі тыкаючы нічліговых місц та місцевой ґастрономіі.

Окрем того публикация веде нас курортами, вказує культовы бескідскы шлякы і гірскы колибы, оповідат о вшыткых містах реґіону, зачынаючы од Нового Санча. Находит ся в ній тіж вельо інформаций звязаных з лемківскыма темами. Можна повісти, же о Лемках і іх спадковині єст цілком вельо написане! Чытач дознат ся з путівника, якы лемківскы церкви лишыли ся в долині Попраду, де сут найбарже інтересуючы з них і яка єст загальна істория Лемків в реґіоні.

Путівник єст частю більшой сериі Travelbook. Як реклямує выдавництво, путівникы мают на ціли вказати найважнійшы атракциі, підповісти, чого глядати поза головныма шляками, і ввести нас в світ місцевых звыків. Найдеме в них провірены інформациі, котры дадут можливіст добрі заплянувати подорож.

Публикациі сут дополнены порядныма мапами, з якых легко можна чытати, красныма знимкамы і вельома інтересуючыма вістками. Вшытко разом получене з выгідным форматом і атракцийным ґрафічным выглядом спричынят, же серия Travelbook то найліпшый выбір для заінтересуваных світом.

Вшыткых заохочаме купувати путівник в книгарнях Емпік в цілій Польщы або на вебсайті выдавництва Бездорожа.