«Говорить Пряшів» – пятниця, 18.10 год.

Свята ся скінчыли, людe ся радуют, світ ся радує, лем якоси на Лемковину дале не хоче прити порядне сонце і тепле повітря. A того нам вшыткым бракує – сонечного проміня, жебы доладувати своі акумуляторы.

Єст єднак надія – має быти ліпше уж од неділі. Найблизша неділя не така як все, бо то Провідна Неділя. Хоц Лемкы во звыку мают одвиджати гробы своіх близкых на Русаля – Зелены Свята, то такой дакотры з них і тепер підут ся помолити за спокій душ. Так єст од шумных років на землях выгнаня, а подібно і од даякого часу на Лемковині, хоц тіж не всяди і тіж не в каждій конфесиі.

Але то уж інчы справы. Займийме ся тым, што напевно нас вшыткых неодолга втішыт. Приде сонце, а з ним придут ліпшы часы. Лем жебы час помальше нам летіл, то бы сме были щестливійшы, то бы сме не нарікали, же ся так скоро старієме. Додайме лем іщы єдно – уж о нецілый місяц рыхтуєме святкуваня десятлітя нашого істнуваня, значыт істнуваня Медияльной Ґрупы ЛЕМ.фм+. Віриме, же святкуваня пройдут під знаком сонця, а вы будете вєдно з нами.

Приємного вікенду.