Сумар дня на 28. квітня/апріля 2021 р.

Приносиме вам сумар медияльной ґрупы ЛЕМ.фм+ на ден 28. квітня/апріля 2021 р.

При повселюдным списувяню бракує материялів про меншыны

В понедільок, 26. квітня/апріля тр., проходило онляйнове школіня тыкаюче Нацийонального Повселюдного Списуваня Жытелів і Мешкань 2021 орґанізуване Міністерством Внутрішніх Справ і Адміністрациі при участи представників Головного Статистичного Уряду. Была то стріча головні для Полномічных Воєводів дс. нацийональных і етнічных меншын. До участи в школіню прошены были і представникы меншын, м.ін. члены Спільной Комісиі Уряду та Нацийональных і Етнічных Меншын – др. Григорий Куприянович і Бернард Ґайда, та Стоваришыня «Руска Бурса» в Ґорлицях, репрезенуване Наталийом Малецком-Новак. Єдном з тем, якыма занято ся на стрічы был брак промоцийных материялів в меншыновых языках, што підкрислили Григорий Куприянович і Бернард Ґайда. До той темы однесла ся пресова представничка Головного Статистичного Уряду Каролина Банашек. Признала, што аж тепер працуют над промоцийныма материялами, особливі тыма присвяченыма меншынам. Припомнийме, што повселюдне пписуваня зачало ся близко перед місяцьом і не попереджало го практичні ниякє промоцийне діяня зо страны ГСУ. То меншыны взяли на себе інформуваня свойой соспільности о конечности списувати ся. Лемківска меншына іщы на зламі років 2020 і 2021 зачала вести промоцийну передсписову кампанію в інтернеті (акциі СмеЛемкы та ЯЛемко), на антені радия ЛЕМ.фм, а тепер переносит ю тіж до позаінтернетового простору, выдаючы промоцийны материялы во спілпрацы з партнерами, якы діют для підтримуваня і промоциі лемківской достоменности, языка і культуры, нп. Выділом «Artes Liberales» Варшавского Університету.

В Крампній побудуют басены

В Крампній рушыла будова басенів. Першым етапом прац буде заґáздувати резервуар, другым выремонтувати ремізу Охотничной Пожарничой Стражы в Крампній. В рамках інвестициі окрем басенів побудуваны будут санітарно-господарчый будинок з фотовольтаічныма панелями та плац забав для діти. В плянах єст тіж пленерова силовня, маневровый пляц з паркінґовыма місцями тя освітліня і моніторінґ терену. Цілковитый кошт прац то веце як 2,7 млн злотых. Інвестиция єст фінансувана з буджету ґміны і дотациі Маршалківского Уряду Підкарпатского Воєвідства для ґміны Крампна. Працы при обєктах плянуют завершыти до кінця жолтна/октобра того рока.

Віртуальны Білеты на експозицию Маґурского Нацийонального Парку

Як поінформувал Маґурскій Нацийональный Парк, одкрыта в 2019 р. сенсорична експозицийя в Едукацийно-Музейным Осередку ім. Яна Шафраньского буде перенесена до простору онляйн. Стацийонарный доступ до експозициі з огляду на пандемічну ситуацию єст од понад рока утрудненый. Маґурскій Нацийональный Парк рішыл удоступнити на своім фейсбуковым профіли «Віртуальны Білеты» – короткы награня з едукаторами, якы дозволят видіти експозицию і в пандемічных обставинах. Віртуальны білеты будут публикуваны періодично, першый з них єст уж доступный на профіли Маґурского Нацийонального Парку.

На Підкарпатю зачали знимкы до нового фільму Сколімовского

Выдатный польскій режысер і актор Єжы Сколімовскій рыхтує нову польско-італияньску продукцию з робочом назвом «ІО». Од четверга, 22. квітня/апріля, екіпа працувала над першыма награнями на фільмовым пляні під стіном Ользы в Рудавці Рыманівскій. «ІО» то фільм вказуючый дорогу осла, якій переходит з рук до рук. Змінят місця, середовиска, аж і державы, з транспортом звірины веденой до убою. Як бесідує режысер, в днешнім світі проходят драстичны транспорты польской конины до Італиі. Коні перевожены сут жывы в негуманітарных условях, дакотры вмерают в дорозі. Творці продукциі хотят порушыти обзерача, а фільм має быти протестом проти бестияльству, на якє люде дозваляют взглядом звірят. Окрем Підкарпатя, творці плянуют крутити іщы м.ін. на Нижнім Шлеску, Варміі і Мазурах, та на Сицилиі в Італиі. Кєд поведе ся завершыти знимкы до кінця липця/юлия, фільм має быти готовый на початку будучого рока.