Сумар дня на 22. квітня/апріля 2021 р.

Приносиме вам сумар медияльной ґрупы ЛЕМ.фм+ на ден 22. квітня/апріля 2021 р.

Туристичном перлином Підкарпатя може стати Музей Лемківской Культуры

До кінця квітня/апріля мож оддавати голосы в плебісциті Польского Радия Ряшів і Польского Товариства Туристично–Краєзнавчого під назвом Туристичны Перлины Підкарпатя. Серед номінуваных обєктів, якы односят ся до дідовизны Лемків, Русинів того реґіону єст предовшыткым Музей Лемківской Культуры в Зындрановій. Номінацию має так само церков з Туриньска, презентуюча східній стиль лемківского сакрального будівництва, яка в 2013 р. была вписана на листу світовой спадковины UNESCO. Місцьом, котре тіж оддає по части духа давной Лемковины, єст номінуваный в плебісциті скансен – Музей Народного Будівництва в Саноку, в якым найти можеме перенесены з Лемковины памяткы архітектуры. Серед номінуваных нашло ся 50 ріжного рода обєктів, якы сут в даякій мірі повязаны з Лемковином. Голосувати мож за мотузком приведеным в статі на нашым портали.

Нова книжка з творчістю Кралицкого

Вышла дальша книжка презентуюча творчіст Анатолия Кралицкого, єдного з найвыдатнійшых русиньскых писменників і діячів ХІХ ст. To книжка під назвом «Князь Лаборець: Выбраны творы». Публикация чыслит близко 400 стран. Можна в ній найти творы Кралицкого в окремых частях Проза, Переклад и адаптація, Из історії Чина св. Василія Великого і Публицістика. Довєдна едиторы выбрали 32 тексты Кралицкого нацийонально-патріотичного напряму. Выберати в його припаді є з чого, бо лишыл по собі понад 400 творів. Влони інформували сме, же з нагоды 125. річниці смерти і 185. річниці народжыня Кралицкого вышла публикация під назвом «Анатолій Кралицькый. Творы». Тоту і попередню приготовили разом Валерий Падяк і Михал Павлич. Книжка єст цінным материялом, не лем про дослідників русиньской літературы і істориі, але самособом публикацийом сплачаме як нарід свій долг Кралицкому, тій «унікатній особности русиньской літературы добы будительства», як пишут авторы.

Увага на переступства в звязку зо списом населіня

Як остерігат ґорлицкій повіт, в звязку з проходячым нацийональным повселюдным списом явили ся уж першы переступства і пробы незгідного з правом діяня даякых осіб, на котры треба мати позір. Злочынці головно за справом інтернетового самоспису хотят перевзяти особовы даны, предовшыткым од сеньорів. Єдном з іх метод єст підсыланя сеньорам нелеґальных інтернетовых сайтів, до якых мают доступ, і пак видят, якы даны вводят особы в підставленым списі. Дальше злочынці подают ся за рахмайстрів через телефон, коли дзвонят до поєдных осіб. Найліпшом методом єст верифікация такой особы, через єй мено, назвиско і номер леґітимациі, якы пак мож провірити в уряді.

Словацкій громадянин нелеґально в Польщы

Вчера, 21. квітня/апріля, польскы пограничникы з Ґорлиц вчас контролі леґальности побыту на обшыри Польщы затримали словацкого громадянина. Вказало ся, што єст то особа, яка вельократно была карана за переступства, на териториі Польской Республикы перебыват з нарушыньом законів. Словак то особа карана, яка має вырок 4 років вязниці. В звязку з тым, же його побыт в Польщы може быти небезпечный для інчых осіб, польскы власти рішыли выдати го словацкій страні, жебы там был розрахуваный зо злочынів через словацкій суд.