Сумар дня на 19. квітня/апріля 2021 р.

Приносиме вам сумар медияльной ґрупы ЛЕМ.фм+ на ден 19. квітня/апріля 2021 р.

Председа Уряду про Словаків жыючых заграницьом з візитом в Сербіі

Од 12. до 17. квітня/апріля тр. проходила робоча візита председы Уряду про Словаків жыючых заграницьом, Міляна Яна Піліпа, в Сербіі. Председа заграничных Словаків в тых днах был в місцях, де жыют сербскы Словакы, мал стрічы зо словацкыма орґанізациями діючыма в Сербіі, Нацийональным Совітом Словаків ци представниками церкви. Піліп 14. квітня/апріля был, вєдно з заступцьом амбасадора Словациі в Сербіі, Ігорьом Венцельом, в Рускым Керестурі, найвекшым центрі войводиньскых Русинів. Был м.ін. в Школі Петро Кузмяк, котра од початку істнуваня має навчальный русиньскій язык. Піліп был тіж з візитом в Нацийональным Совіті Русинів ци Катедральным Соборі св. отця Миколая в Рускым Керестурі.

Новы літні желізницьовы получыня

Од 3. липця/юлия до 5. вересня/септембра тр. одкрыти будут вікендовы желізницьовы получыня Малопольской Желізниці реляциі Ясло – Крениця – Ясло і Ясло – Новый Санч – Ясло. Потягы будут ся затримувати і в Ґорлицях. В Яслі будут скомунікуваны з потягом «Вояк Швейк» реляциі Ряшів – Меджелабірці – Ряшів. Завдякы тому желізниця получыт Сандецку і Ґорлицку Землю з Бєщадами і східньом страном Низкого Бескіду.

«Лемко. Unnamed. Безіменны» 

Єден з найславнійшых і найвекшых музеів світа, Державный Музей Ермітаж в Санкт Петерсбурґу, гостит в своіх порогах XV медженародну едицию «Діалоґу Культур», орґанізувану безпрофітовом орґанізацийом Медияконґрес «Спільнота Журналистів». В рамках той подіі вказуваный є фотопроєкт Михала Шымко і ґрафічкы Домінікы Хмєлевской пн. «Лемко. Unnamed. Безіменны». Авторы выставы схоснували техніку коляжу – на сучасны фотоґрафіі вклиіли архівальны знимкы. Коляжы мают перенести публику в неістнуючый, выкреуваный світ, якій хтіли бы видіти сучасны Лемкы. Не находит ся він в територияльных границях полудньово-східньой Польщы, але в серцях і памяти жыючых гын Лемків. Веце о выставі і бесіду з єй спілавтором Михалом Шымко можете чытати на нашым портали.

Новый цикль вебінарів МНП

Маґурскій Нацийональный Парк просит на цикль штырьох вебінарів пн. «При джерелі», якы будут тыкати тем звязаных з охороном природы. Першу стрічу пн. «Ци страх може помочы в охороні природы?» буде вюл Адам Збырыт, працівник Польского Товариства Охороны Птахів і Выділу Біолоґіі Університету в Білымстоку, автор книжкы «Краєвид страху». Як пишут орґанізаторы, страх єст єдном з найбарже примітивных емоций, яка од все товаришыт орґанізмам. В часі стрічы прелеґент одповіст м.ін. на звіданя: ци мож схоснувати страх для охороны природы і ратуваня загороженых ґатунків і сідлиск, як чловек єст постеріганый ріжныма звірятами, на што людам дикы обшыри, нацийональны паркы зо стислом охороном і чом часом вартат закрыти туристичны шлякы. Вшыткы вебінары будут доступны нажыво на фейсбуковым профіли Парку, буде мож іх одтворити і в пізнійшым терміні. Першый з вебінарів одбуде ся уж заран, 20. квітня/апріля, о 19.00 год.