Сумар дня на 16. квітня/апріля 2021 р.

Приносиме вам сумар медияльной ґрупы ЛЕМ.фм+ на ден 16. квітня/апріля 2021 р.

Пандемічны рестрикциі продолжены

14. квітня/апріля одбыла ся пресова конференция, на котрій польскій Міністер Здоровля Адам Нєдзєльскій передал інформациі тыкаючы актуальной пандемічной ситуациі в державі і обовязуючых ограничынь. За міністром Нєдзєльскым – дале мают обовязувати вшыткы дотеперішні ограничыня окрем єдного. Од найблизшого понеділька, 19. квітня/апріля, одкрыты будут предшколя і ясла. Вшыткы інчы ограничыня власти рішыли выдолжыти до 25. квітня/апріля. Додатково до 3. мая продолжены будут рестрикциі звязаны з готелями. Іщы єдном зміном єст дозволіня на спортову активніст на свіжым повітри.

Пріматор Нового Саду стрітил ся з делеґацийом Руской Маткы

В віторок, 13. квітня/апріля, пріматор Нового Саду в Сербіі Мілош Вучевич принял делеґацию русиньской орґанізациі Руска Матка. Стріча была заініциювана пріматором. Запропонувал на ній спілпрацу міста з орґанізацийом Руска Матка і дальшыма русиньскыма орґанізациями, котры діют в рамках Войводины, але і в цілій Сербіі. На пропозицию Дюры Папуґы, председы Руской Маткы, Вучевич згодил ся з тым, жебы Новый Сад был місцьом одбываня XVII Світового Конґресу Русинів, котрый мал бы проходити в 2023 році, і котрый хоче орґанізувати Руска Матка. Представникы русиньской орґанізациі бесідували і о дальшых актуальных темах і рішаню проблемів, котры тыкают ся Руской Маткы і Русинів загально.

Онляйнова дебата «Молоды языковы активісты Европы»

Стоваришыня Вілямівяне просит на онляйнову дебату, яка одбуде ся 22. квітня/апріля о 17.00 год. Тема стрічы то «Молоды языковы активісты Европы». Бесіда пройде в анґлицкым языку. Стріча єст орґанізуваня з нагоды печатаня анґлицкого тлумачыня выдавництвом Peter Lang Publishing House книжкы Ніколь Доловы-Рыбіньской пн. «No One Will Do This For Us» – «Нихто того за нас не зробит». Языковы і культуровы практикы молодых активістів языковых меншын Европы. Публикацию мож дармо побрати на інтернетовым сайті выдавництва. Стрічу будут вести Юстина Маєрска-Шнайдер, вілямівска ативістка, докторантка Artes Liberales Варшавского Університету, і Майкель Горнсбі, професор на Університеті Адама Міцкєвича в Познані. На стрічы Ніколь Доловы-Рыбіньска коротко запрезентує своі досліджыня над молодыма активістами выбраных меншыновых языків в Европі. О дорозі до свого заанґажуваня в борбу о языкы своіх спільнот оповідят пак запрошены гості – представникы ріжных языковых меншын Европы, в тым лемківской.

О тыжден пройде 9. Форум Сеньора

21. квітня/апріля тр. пройде 9. едиция Форум Сеньора, орґанізуваного «Ґазетом Краківском» і «Польскым Денником» в партнерстві з Ягайлоньскым Універистетом, Малопольскым Воєвідством, курортом Крениця-Жеґєстів і інчыма. Форум Сеньора то серия інтересуючых выкладів, порад експертів і одповіди на найважнійшы звіданя з обшыри здоровля і безпекы старшых осіб. В тым році з огляду на безпеку участників подія буде трансмітувана в інтернеті.