Сумар дня на 15. квітня/апріля 2021 р.

Приносиме вам сумар медияльной ґрупы ЛЕМ.фм+ на ден 15. квітня/апріля 2021 р.

«Лемко» і «Карпатска Русь» доступны онляйн

Як інформує америцкій Лемко Союз (Lemko Association) одкрыта была бета версия сайту, на котрым доступны сут архівальны выданя еміґрантскых ґазет «Карпатска Русь» і «Лемко». Разом 1137 номерів ґазет. Сут то примірникы з років 1928-1949 і дале 1981-1989. Ґазета «Лемко» была выдана першый раз 1. квітня/апріля 1928 рока в Філядельфіі. Выходила до зламу років 1939 і 1940, коли рішыньом власти орґанізациі была злучена з ґазетом «Карпатска Русь», котра остаточно заступила «Лемка». «Карпатска Русь» являт ся джерелом неоціненых інформаций про быт Лемків і обставины, в якых пришло ім жыти і одраждати ся по выселінях. Актуально выдавана єст по анґлицкы, нереґулярно. Мотузок до діґітальной бібліотекы обох ґазет Лемко Союза найдете на нашым портали.

«Річник Руской Бурсы» можеме творити разом

Як інформує головна редакторка «Річника Руской Бурсы» др габ. Олена Дуць-Файфер, тырвают уж рыхтуваня до 17. тому публикациі на 2021 р. Буде то зас моноґрафічне чысло, сконцентруване докола темы «Просторовы аспекты в лемківскым/русиньскым дискурсі». Редакция «Річника Руской Бурсы» зверат ся до вшыткых заінтересуваных, жебы брали участ в творіню выданя і надсылали своі тексты. Ведуча тема односит ся до простору як єдной з основных культуровых катеґорий стисло повязаных з етнічном достоменністю і ріжныма взорами орієнтациі, якы сут соспільні творены даном спільнотом. Уж в самым названю Карпатскых Русинів містит ся безпосереднє просторове однесіня до конкретной териториі, яка была міцно усимволичнена в етнічным/культуровым дискурсі. Тему мож представити нп. в обшыри лінґвістичных конструкций, в рамках антрополоґічных, социйолоґічных ци культуровых досліджынь, але і на ґрунті красной літературы. Ґеоґрафічны ци природничы тексты, якы повязаны сут з лемківскым/русиньскым простором, тіж будут браны до увагы. Tему статі і короткій єй плянуваный зміст треба присылати на адрес rocznik.ruskiej.bursy@wp.pl до 15. мая тр. На нашым портали неодолга найдете деталі.

Діґітализация метрикальных книг в Войводині

Завод за культуру войводиньскых Русинів зачне неодолга проєкт діґітализуваня метрикальных книг грекокатолицкых парохій в Себріі. Буде то першый проєкт, на якій Завод в тым році отримал фінансы. Проєктом обняты будут метрикы старшы як 100 років з обшыри грекокатолицкых парохій, такых як в Коцурі, Старым Вербасі, Новым Саді і Дюрдьові. В пляні є, жебы пак здіґітализуваны книгы были доступны в інтернеті. Цілю проєкту єст не лем сохранити богатство записів метрик, але так само заінтересувати будучы ґенерациі минулым войводиньскых Русинів. Найстаршы метрикы походят з років 1778 і 1779 з коцурской і рускокерестурской парохій. Здіґітализуваны метрикы можут быти цінным джерелом історичных і ґенеалоґічных інформаций не лем про войводиньскых Руснаків, але самособом про Русинів з Карпат, одкале перед роками одышли на обшыр днешньой Сербіі нашы предкы.

В Старій Любовни одкрыли вакцинацийный центр

В Старій Любовни на Пряшівскій Руси в просторах містецкой спортовой салі фунґує уж великій вакцинацийный центр. В послідній віторок центр тот одкрыл Пряшівскій Самосправный Край во спілпрацы з любовняньскым шпытальом. Заінтересуваня вакцинацийом в Старій Любовні є, но дошло і до проблемів при реґістрациі. Тых, котры хотіли отримати вакцину в Старій Любовни, систем приголошувал наприклад до Баньской Быстриці ци Жыліны. То дальшый реґіон Пряшівской Руси, де прожыват великє чысло Русинів і де мож уж приняти вакцину. В Польщы што кус реґіструваны до отриманя вакцины сут молодшы річникы.