Сумар дня на 14. квітня/апріля 2021 р.

Приносиме вам сумар медияльной ґрупы ЛЕМ.фм+ на ден 14. квітня/апріля 2021 р.

Автострада получыт Словацию і Украіну

Як інформувал порталь Новини Закарпаття, недавно прошла онляйн стріча працівників Закарпатской Областной Адміністрациі з працівниками зо Словациі, на котрій занимали ся перспективами злучыня Украіны і Словациі автострадом D1. Дорога має фінально злучыти Братиславу з Загором коло державной границі з Украіном, і іти через Тырнаву, Тренчын, Жыліну, Мартін, Попрад, Пряшів, Кошыці і Михалівці. Частю автострады має быти і новый граничный перехід. Актуально будова дорогы стоіт ближе як 80 км до границі державы. В часі онляйн конференциі обидві стороны были згідны, же є важным навязати спілпрацу і рішыти, в якым напрямі до державной границі з Украіном дале будувати дорогу. За украіньскым портальом – дальша така стріча мала бы пройти за кус веце як місяц.

Русиньскій священник нагородженый Орденом Мадярского Золотого Креста

Як інформувало на своім сайті Вседержавне Русиньскє Самосправуваня, в марци тр. президент Мадяр Янош Адер нагородил Орденом Мадярского Золотого Креста грекокатолицкого священника і русиньского патріоту Яноша Мігаля Соноцкого. Пропозиция дана премєром Віктором Орбаном была підпорена діяльністю Соноцкого в консолідациі і представляню інтересів русиньского соспільства жыючого на Мадярах, сохраніньом і популяризацийом русиньской культуры на Мадярах. Янош Мігаль Соноцкій є священником Мішкольцской Грекокатолицкой Єпархіі на пенсиі, заступцьом председы Общества Русинів/Рутенів Мадяр, редактором ґазеты Русинів на Мадярах «Русиньскій Світ». На Мадярах і за іх границями є знаный як тот, хто хоронит русиньскы традициі.

Ґорлицкы Дни Землі 2021

Як інформує Містецкій Уряд в Ґорлицях, од 17. до 30. квітня/апріля будут проходити Ґорлицкы Дни Землі. В тым часі в місті ведены будут акциі прятаня, до участи в котрых прошены сут жытелі Ґорлиц. Першом з них буде «Операция Чыста Ріка», в рамках котрой волонтеры разом з орґанізацийом Мій Чыстый Повіт будут прятати обшыр при ґорлицкых ріках. Пак прятаны будут вшыткы занечыщены терены на обшыри міста. Потрібне ґратя буде забезпечене Урядом. Орґанізаторы просят зробити фотоґрафіі місц перед і по прятаню, з котрых пізніше зроблена буде ґалерия і Мапа Прятаня. Каждый прятаючый нагородженый буде рослином, яку буде міг пак посадити в рамках акциі «Зеленый Рекорд Польщы», яка одбуде ся 30. квітня/апріля. Участникы так само прошены сут зробити знимку перед і по посаджыню рослины і опубликувати єй в социяльных медиях з гаштаґом #ZielonyRekord2021. Каждый участник Зеленого Рекорду отримат цифровый цертифікат участи і подякуваня.

Новый інтернетовый сайт Пути Деревяной Архітектуры

Інтернетовый сайт Пути Деревяной Архітектуры прошол модернізацию завдякы фінансовій підпорі з Проґраму Трансграничной Спілпрацы Польща-Білорусь-Украіна 2014-2020. Страну дополнили новым змістом і фотоґрафіями вынятковых памятників. Завдякы сучасній технолоґіі VR туристы можут обзерати выбраны обєкты в віртуальній реальности, в тым нп. кольорову церков в Святковій Великій. Зміст на сайті доступный є в польскым, анґлицкым і украіньскым языках. Схоснувано і механізмы, што дают можливіст перезерати сайт особам маючым проблемы з зором. Приміры деревяной архітектуры злокализуваны сут на девятьох опрацуваных трасах. Примірно саноцко-дукляньска обнимат лемківскы церкви в Гыровій, Команчы, Котани, Крампній, Вільхівци, Перегримці, Репеди, Святківці, Святковій Великій, Щавным і Туряньску та забудову Яслиск.