Русиньскый священик нагородженый Орденом Мадярьского Золотого Креста

Як інформовало на своїм сайті Вседержавне русиньске самосправованя, в марці 2021-го року презідент Мадярьска Янош Адер своїм рішіньом нагородив Орденом Мадярьского Золотого Креста ґрекокатолицького священика і русиньского патріота Яноша Мігаля Соноцького.

Презідент так зробив на пропозіцію премєра Віктора Орбана. Номінація Соноцького была за його діялность у консолідації і представльованю інтересів русиньской комуніты жыючой в Мадярьску, за сохраніня і популаріацію русиньской културы в Мадярьску.

Янош Мігаль Соноцькый є священиком Мішколцьской ґрекокатолицькой єпархії на пензії, заступник председы Общества Русинів/Рутенів Мадярьска. Довгодобо є в Мадярьску і за граніцями знамый як тот, котрый хоронить русиньскы традіції.

Народив ся 6-го мая 1954-го року у Шайовсентпейтері. По закінчіню Ніредьгазького теолоґічного інштітуту у 1978-ім році го єпіскоп Др. Сілард Керестеш рукоположыв на сященика у селі Ракаца. Свою путь душпастыря зачав Янош Мігаль Соноцькый у Овзді як каплан, а дале служыв парохом у селах Модьоровшка, Філкегаза, Ґадна, Абауйсантов і Шайовпетрі. Як священик пізніше діяв у мішколцьскім шпыталю і соціалнім домі.

Отець Соноцькый написав много статей до реліґійных періодічных выдань Görögkatolikus szemle (Ґрекокатолицькый обзор) і Keresztény élet (Хрістіаньськый жывот). Од 2011-го року быв головным редактором ґазеты Русинів у Мадярьску Русинськый Світ – Ruszin Világ. Доднесь є редактором той ґазеты.

Презідент Янош Адер отцьови Соноцькому, але і далшым шестьом священикам Мадярьской ґрекокатолицькой церькви уділив ордены 15-го марца, коли є в Мадярьску державне свято – Мадярьске націоналне свято револуції і боротьбы за слободу.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА