«Слово» – 4-та неділя Великого посту – неділя, 9.00 год.

Вступили сьме до половины святого постного часу, до 4-ой постной неділі. Євангеліє нам вказує отця, котрого сын мав нечістого німого духа. Тот його мучів і непокоїв як настав нов місяця.

Отець наперед приводить його ку Ісусовым ученикам, котры не можуть йому помочі. Кедь Ісус приходить ку народу, отець приходить ку ньому і просить помочі. Но вказує в собі атмосферу невіры. Або ліпше, віру в силу зла. Прото і Ісус йому говорить: О невірне поколіня…

Ісус пришов зничіти тоту віру в силу зла і обновити в людях віру в силу добра. Кедь отець хлопця просить о поміч, знова указує свою невіру: Кедь можеш, помож нам. Ісус на тото одповів: Вшытко є можне тому, хто вірить. А давать наказ нечістому духу, жебы вышов із хлопця а уж ся там не вертав. А злый дух такой мусив послухати свого Сотворителя і выйти з нього.

Так днешнє слово нас учіть: вірити в силу добра. Ісус пришов дати ослободжіня. Каждому, хто ку ньому приходить, давать свій покій, своє одпущіня. Утверджує в людях віру, же зло не мать посліднє слово. Але посліднє слово належыть Богу, котрому ся вшытко повинує на небі, на землі і в аді.

Злый хоче, жебы люде виділи лем силу зла, а за зло обвиньовали Боже сотворіня а тым і Господа Бога. Вказує на місяць як Боже сотворіня, але і як причіну зла і тепріня того хлопця. А так вказує на Бога, котрый сотворив тот місяць, котрый є злым, тым самым веде людей думати о Богу як причіні зла.

Ісус одкрывать тоту хытрость діавола, кедь тот хлопець зазнавать мучіня од злого, кедь быв приведеный ку Ісусови. Так Ісус одкрыв, же не місяць быв на причіні, але злый дух, котрый ся скрывав за місяць. Най тото слово і нас укріпить у вірі в побіду Хріста. А тогды Його побіда, стане і нашов побідов. Слава Ісусу Хрісту!

В неділю, 11. апріля 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 11. апріля о 12.00 год. і 12. апріля о 2.00 год. за русиньскым часом.