Сумар дня на 9. квітня/апріля 2021 р.

Приносиме вам сумар медияльной ґрупы ЛЕМ.фм+ на ден 9. квітня/апріля 2021 р.

Пандемічны ограничыня продолжены

В середу, 7. квітня/апріля, польскій міністер здоровля Адам Нєдзєльскій скликал пресову конференцию, на котрій поінформувал о продолжыню ограничынь спричыненых пандемійом коронавіруса. Як подал міністер, в шпыталях єст актуально занятых около 80% місц. Невеликє зменшыня чысла хворых єст подля него спричынене святочным періодом і аж в будучым тыжни будут видны ефекты збільшеного руху в тым часі. З той причыны власти рішыли продолжыти обовязуючы ограничыня до 18. квітня/апріля. Закрыты остают готелі, склепы будівляны і з меблями выже 2 тис. м2, гандльовы центры, косметичны і фризиєрскы заклады, театры, кіна, музеі, ґалериі штукы. Спортовы осередкы сут доступны лем для професийного спорту. Закрыты остают предшколя і дітячы ясла, а школы мают продолжувати з вчыньом на дистанс. Так само ограничене остає чысло осіб во вшыткых гандльовых пунктах і в обєктах реліґійного культу і заказ збераня ся в ґрупу веце як пятьох осіб.

Ропу і Ґорлиці получыт біциґльова стежка

Як подал для радия РДН війт ґміны Ропа Кароль Ґурскій, ґміны Ґорлиці і Ропа будут неодолга получены біциґльовом стежком. Пут буде збудуваный медже Ропом а Шымбарком, де злучыт ся з уж істнуючом стежком в страну Ґорлиц. Проєкт буде зреализуваный завдякы спільному фінансуваню обох ґмін з Урядового Фонду Локальных Інвестиций. На будову стежкы самоуряды передадут разом 3 млн 700 тис. злотых. Нова біциґльова стежка має быти оддана до хоснуваня уж в будучым році.

44. Карпатскій Фестіваль Дітячых Реґіональных Ансамблів

До 2. червця/юнія тр. мож ся зголошувати до 44. Карпатского Фестівалю Дітячых Реґіональных Ансамблів, якій має в тым році пройти онляйн. Орґанізаторами сут Малопольскій Центр Культуры Сокіл в Новым Санчы і Містецкій Осередок Культуры в Рабці. До участи в фестівали просят діточы реґіональны ансамблі з ріжных етноґрафічных ґруп з Карпат і Підкарпатя на обшыри трьох воєвідств: малопольского, підкарпатского і шлезского та ансамблі маючы карпатскій рід. Ґрупы мусят представити проґрам основаный на автентичным, діточым фольклорі свого реґіону, при товаришыню традицийной музикы і в реґіональным облечыню. Дрібниці про зголошыня сут поміщены м.ін. на інтернетовым сайті Малопольского Центру Культуры Сокіл в Новым Санчы.

Другє гніздо сапсанів найдено в ТНП

Недавно інформували сме, што на східній страні Костельця явили ся сапсаны, барз рідкій і хороненый в Польщы ґатунок соколів. З той причыны дирекция Татряньского Нацийонального Парку рішыла закрыти до кінця липця/юлия туристичны дорогы і пути, котры ідут од Комина Древновского по Кулюар Заруского. Вчера на фейсбуковым профіли Парку явила ся інформация о другым гнізді соколів, якє найдено при Цубриньскій Казальници. В звязку з тым од 8. квітня/апріля до 31. липця/юлия закрыта для альпінізму і ізды на лыжах остає наступна обшыр Парку од Кулюара Криґовского до Монашого. За природниками з ТНП, до кінця липця/юлия молоды соколы винны безпечні лишыти гніздо, а до того часу не повинно ся ім перешкаджати.