Обзерач Природы #27 – пятниця, 13.00 год.

Сердечні просиме слухати природничый проґрам на антені ЛЕМ.фм уж в найблизшу пятницю, 9. квітня/апріля 2021 р., о 13.00 год. «Обзерач Природы» то пропозиция для любителів природы, лісовых звірят, вандрівок в незнане.

Не буде то першый раз, як поіхаме в Низкій Бескід і на Лемковину. Де тым разом підеме і што інтересуюче будеме обзерати в проґрамі? Дознаме ся м.ін., чом Лацкова была давнійше называна «поліцийном гором» та де найліпше провести вакацийный час в лемківскых горах далеко од цивілизациі, а близко люди. Днешній проґрам буде першым з мінісериі 4-ох одтинків інспіруваных діяльністю Пьотра Косярского, подорожника, гірского вандрівника, якій веде блоґ Мапа Бездорожа. Більше о його пригодах можете чытати на його блоґу.

Проґрам веденый єст Якубом Зиґмунтом, ґеолоґом і пасийонатом гірскых вандрівок. «Обзерача Природы» мож слухати в кажду пятницю о 13.00 год., а повторіня авдициі будут емітуваны в середы о 10.00 год.