«Слово» – 3-тя неділя Великого посту – неділя, 9.00 год.

Третя неділя Великого посту або і Крестопоклонна неділя, бо на утрені той неділі ся выкладать Святый Крест. Церьков нам указує Святый Крест як підкріпліня до далшого подвигу посту.

Давать нам заохоту іти далше в нашім путованю ку празднику Пасхы. І днешнє слово Євангелія нас позывать прияти слова нашого Господа о кресті.

Хто хоче іти за мнов – перше условіє хотіня, рішіня нашой слободной волі. Ісус нам давать слободу. Хоче, жебы сьме ішли за ним, были його учениками, прияли його слова добровольно, без присилованя. Як є перше условіє, тогды додавать – най одрече ся самого себе і бере свій крест а іде за мнов. Хто прийме тото рішіня – хочу, перед тым повставать і тяжкость – одречі ся себе, своїх планів, своїх выходженых стежок, своїх выгод, свойого самолюбства а доволити Хрістови, жебы быв Царьом нашого сердця.

Як і Йоан Креститель говорить: Він мусить рости а я маліти. Тото многораз не є легко. А іщі додав: Най бере каждый день свій крест.

Про каждого може быти тот крест в дачім іншім. Про єдных родина, муж, жена, діти, робота, одношіня в сусідстві, ці даякы проблемы, хвороты а под. Або може быти высміваня, зневажованя ці переслідованя за імя Хріста.

Тото Ісус дале продовжать, кедь говорить: Хто хоче сохранити свою душу – стратить, а хто стратить, тот сохранить. Хто собі за ціну одступницьтва од Хріста хоче утримати тото земне, тот утратить небесне, але і земне. Бо хто ся ганьбить за Хріста ту на землі, за того ся буде ганьбити Сын чоловіка, кедь прийде зо вшыткыма ангелами.

Так, смотрячі на крест, памятайме, уж недовго і наше путованя ся завершыть. Але тыж нам указує і наше путованя ку вічности. Жебы добровольно вырішыти каждый день іти за Хрістом, одрікати ся себе, брати свій крест. Не ганьбити ся Хріста ту на тій землі, жебы ся і Він за нас не ганьбив у вічности. Слава Ісусу Хрісту!

В неділю, 4. апріля 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 4. апріля о 12.00 год. і 5. апріля о 2.00 год. за русиньскым часом.