Щедрий Вечер, Добрий Вечер – Йорданьска велия

Днес, перед посліднім з трьох великых праздників перелому старого і нового рока – Йорданом, в вельох русиньскых хыжах зас засідают до велиі.

Хоц тота “друга” велия меньше популярня як різдвяний Святий Вечер, і днес вломиме дору, принесену рано з церкви, на нашых столах ґаздыні поставлят чеснок, кєселицю, перогы, бобалькы, горох, фізолу, грибы, капусту і інчы пістны стравы.

Днешні полазникы в вельох місцях называны были “щедраками”, од названя днешньой велиі – “Щедрий Вечер”. До коляд, в котрых дотепер головном темом было народжыня Ісуса Христа, доходят і щедрівкы, котры односят ся до Старого Завіту, напр. на Лемковині шыроко знана была коляда “Ходил Господ по раю”, о бесіді Бога з біблийным Адамом, співана на мелодию “Ангел пастырям мовил”.

Вечером, в церквах буде служене Великє Повечеря, а по ним перший раз вызвучыт поздоровліня “Христос ся Крещає!”, з одповідю “Во Йордані!”. Щедракы підут вінчувати по хыжах щестя і здравля в тым новым році.

І мы Вам того желаме!