Сумар дня на 29. марця 2021 р.

Приносиме вам сумар медияльной ґрупы ЛЕМ.фм+ на ден 29. марця 2021 р.

Змінена форма матуральных іспытів

Центральна Еґзамінацийна Комісия опубликувала на своім інтернетовым сайті матуральны інформаторы, тыкаючы новой формы еґзамінів, яка буде обовязувала в Польщы од яри 2023 рока. Абітуриєнты будут мати обовязок приступити до трьох писемных еґзамінів: з польского языка, математикы і новожытного чужого языка та єдного писемного еґзаміну до выбору (охочы можут приступити до іщы пятьох такых еґзамінів). Обовязковы будут тіж устны еґзаміны з польского і чужого языків. Введены будут зміны і для іспытів з поєдных предметів, тіж для еґзамінів з языків нацийональных і етнічных меншын та реґіонального языка. На устный еґзамін з лемківского языка будут ся складати дві задачы, а не як актуально єдна. Перша буде провіряла знаня про обовязкову лектуру, друга буде тыкала проблему звязаного з культуром, на основі долученого до ней тексту. Приказы до першой задачы мают явный характер і будут опубликуваны в комунікаті директора Комісиі найпізнійше до 1. вересня/септембра, попереджаючого шкільный рік, в котрым проведены будут матуральны іспыты. Так само на дві части буде поділеный писемный еґзамін – в першій треба буде одповісти на тестовы звіданя, а в другій написати есей. Час писаня еґзаміну буде выдолженый зо 180 до 210 минут.

Карпатска Писанка 2021

Медженародна конкурсово-презентуюча выстава писанок і великодніх декораций пн. Карпатска Писанка, яку традицийно каждого рока орґанізує Выгорлятскій Музей в Гуменным, пройде в тым році в зміненій формі. Як поінформувала Яна Федічова з гуменьского музею, з причычы пандеміі Карпатска Писанка пройде в тым році в рамках онляйн проєкту Музей на дома. На інтернетовым сайті музею мож обзерати колекцию архівальных документів, тє. фотоґрафіі з 28 попередніх річників той подіі, і чытати коротку ґенезу выникнутя і розвитку найвекшой медженародной выставы писанок на Словациі, котра розвинула ся в просторах Выгорлятского Музею в Гуменным і на котрій презентувало ся уж понад 500 авторів зо Словациі, Украіны, Польщы, Мадяр, Чешской Республикы, Румуніі і ЗША. Карпатску Кисанку 2021 дополнює презентация великодніх поздоровлінь і почтовых карток зо збіркового фонду гуменьскочо музею. Музей в рамках едукацийного проґраму зрыхтувал і Забавну Писанку для діти, в формі робочых листів і гры пексесо. Вшытко тото мож найти на інтернетовым сайті Выгорлятского Музею в Гуменным.

Новый напрям на Ягайлоньскым Університеті

На Ягайлоньскым Університеті в Інституті Реліґійознавства одкрыто новый напрям студий першой ступени. «Карпатскій реґіон: етнолінґвістика і культуровы студиі» то проґрам о інтердисциплинарным характері, якій лучыт елементы языкознавства, культурознавства і реліґійознавства. Закладат трилітнє вчыня словацкого і украіньского языків і можливіст вчыня основ румуньского і лемківского. Студиі будут тыкати і проблематикы нацийональных, етнічных і реліґійных меншын. Проґрам як єдиный в Польщы має в оферті модулы посвячены лемківскій культурі.

Оплата за вхід до Бєщадского Нацийонального Парку

По більше як штырьомісячній зимовій перерві Бєщадскій Нацийональный Парк зас бере оплату за вхід до парку. Білеты мож купити в електронічній формі через інтернетову плятформу e-parki. Од 16. квітня/апріля одкрыты будут тіж інформацийны пункты Парку. Як інформує Парк, 15% приходів передане буде на Гірскы Охотничы Ратовничы Службы (ҐОПР). Решта середків буде схоснувана на утриманя шляків і туристочной інфраструктуры Парку та реализацию задач в обшыри охороны природы і едукациі.