«Слово» – 2-га неділя Великого посту – неділя, 9.00 год.

Ісус Хрістос приходить до Капернаума. Кедь в домі учіть, было там вельо людей, а не было місця ани при дверях. Четверо людей несли невладного чоловіка, не могли ся дістати ку ньому, так выходять на стріху, спущають го перед Ісуса.

А Він, видячі їх віру, говорить невладному: Довірюй, не бій ся. Одпущають ся тобі твої гріхы. Тоты четверо приношають того невладного, вірять, же Ісус може подати йому здравя. А Ісус реаґує іншак. Не говорить: Встань, єсь здравый, але одпущають ся ті гріхы.

Просьба тых людей была – здравя того чоловіка. Ісус выповнять їх прошіня, котре жадають, через вонкашнє діло принесіня того невладного і спущіня долов перед Ісуса. Ісус і подавать здравя, але важніше. Ісус видів, же тот чоловік мать нелем тоту вонкашню, тілесну паралізу, але і внутрішню, то є, же ся находить в рабстві гріха. Прото наперед одстранює тото внутрішню хвороту. Подавать одпущіня гріхів. А кедь много нарікають, же тым ображать Бога, Ісус на потверджіня того, же може одпущати гріхы, выздравлять і тіло того чоловіка.

Тым днешнім словом нам Ісус указує, жебы сьме в тот постный час ся заміряли на то, што є найважніше, то є на здравя нашой безсмертной душы, жебы сьме сі робили щірый іспыт совісти, щіро жаловали, а принесли ку Ісусові в тайні сповіді нашы гріхы.

А так і мы будеме чути слова: Не бій ся, не смоть, якы суть твої гріхы. Довірюй мі, а учуєш тогды: Одпущають ся тобі твої гріхы. Слава Ісусу Хрісту!

В неділю, 28. марца 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 28. марца о 12.00 год. і 29. марца о 2.00 год. за русиньскым часом.