Сумар дня на 24. марця 2021 р.

Приносиме вам сумар медияльной ґрупы ЛЕМ.фм+ на ден 24. марця 2021 р.

Світовый Ден Русинів

Вчера, 23. марця, святкували сме Світовый Ден Русинів. Свято было схвалене в 2017 році Світовым Конґресом Русинів, котрый проходил в хорватскым Осієку. Дата была выбрана на ден, коли закінчыл ся 1. Світовый Конґрес Русинів. Тот проходил 23.-24. марця 1991 рока в Меджелабірцях. Од того часу минуло 30 років. 1. Світовый Конґрес Русинів зачал новодобный процес возроджыня Русинів во вшыткых обшырях культурно-соспільного і християньского жытя в окремых державах. На конґресі в Меджелабірцях участникы здобыли першы інформациі о жытю Русинів в окремых державах, навязали першы медженародны контакты і добесідували ся на конкретну спілпрацу. Русины становили собі товды смілы, конкретны ціли і поступы, як досягнути вызнаня і зрівноправніня Русинів в своіх державах. Хоц Світовый Ден Русинів был выголошеный в 2017 році, офіцияльно был празднуваный лем раз, в 2019. Минулого рока, так як і того, ниякы святкуваня оголошены не были. Причыном є предовшыткым пандемічна ситуация, котра не дозвалят орґанізувати культурно-соспільных подій ани на Словациі, ани в інчых державах. Окрем Світового Дня Русинів окремы членьскы державы мают выбраны і своі локальны Дни Русинів, котры одкликуют ся до даякой історичной подіі, яка є повязана в тій державі з Русинами. В Польщы єст то 5. грудня/децембра, ден-річниця основаня Руской Народной Республикы Лемків.

Клокочівска Богородиця Покровительком Земплина

В четвер, 25. марця, на свято Благовіщыня Пресвятой Богородиці, буде во вшыткых храмах грекокатолицкой Церкви на Словациі прочытаный декрет Конґреґациі про Східні Церкви в Римі. Декретом Клокочівска Богородиця буде выголошена Покровительком Земплина. Так само до літургічночо календаря грекокатоликів на Словациі буде доданый новый праздник під назвом Памят Чудотворной Клокочівской Іконы Пресвятой Богородиці, Покровителькы Земплина. Інформувал о тым Пресовый Центр Кошыцкой Єпархіі. З жаданьом выголосити Пресвяту Богородицю з Клокочова Покровительком Земплина і выголосити новый праздник звернула ся до Конґреґациі в минулым році Рада Єрархів грекокатолицкой Церкви на Словациі. Наперед декрет мал быти выголошеный в грудни/децембрі минулого рока, але м.ін. з огляду на пандемічну ситуацию святкуваня были перенесены на пізнійшый термін. З причыны протипандемічных ограничынь была перенесена о рік і пут з Клокочівском Іконом до Риму, котру папа римскій Франциск прийме в Ватикані 29. червця/юнія тр. на праздник свв. Петра і Павла. Як дальше інформує Кошыцка Єпархія, єдночасно были на неділю, 15. серпня/авґуста, перенесены і головны святкуваня Ювілейного Рока 350. річниці слезиня іконы.

Архівальны інтервю з Новосільскым

Польскє Радийо спомнуло на вызначного лемківского артисту Юрия Новосільского в 10. річницю його смерти. З той нагоды на інтернетовым сайті Радия были удоступнены фраґменты архівальных інтервю з Новосільскым. Слухати мож авдицию Єжы Свальского «Вітрина штук вшелеякых» з мая 1992 рока, де Новосільскій бесідувал о іконах і малярстві. Інчым удоступненым награньом єст авдиция Єжы Свальского з 1993 рока пн. «Юрий Новосільскій – жытя і творчіст», в котрій артиста бесідувал про жытя, творчіст і православя.

Новы проєкты Музею Модерного Кумшту Енді Варголя

Музей Модерного Кумшту Енді Варголя з огляду на пандемічны рестрикциі переносит своі активности в простір онляйн. Як поінформувала аґентура TASR, 18. марця музей зачал на своім фейсбуковым профіли проєкт пн. «Coffee break». За його посередництвом музей має кажде рано, медже 9.00 а 9.30, «ґу ранній каві» публикувати на своім фанпейджы ріжны цікавы інформациі зо світа штукы і з жытя, істориі і діяльности музею. Од початку марця музей рыхтує так само проєкт «Factory People», якій раз в тыжни має приближати артистичне середовиско і люди, котры были близко з Енді. Інчым проєктом, о котрым бесідувал для аґентуры TASR директор музею Мартін Цубяк, єст інтерактивный проєкт «15 минут славы», якій, кєд дозволит на тото пандемічна ситуация, міг бы ся зачати в словацкых містах і селах в квітни/апріли тр.