Сумар дня на 23. марця 2021 р.

Приносиме вам сумар медияльной ґрупы ЛЕМ.фм+ на ден 23. марця 2021 р.

«Вратувати од непамяти» – новый проєкт ґміны Санкова і Нижньой Полянкы

Ґміна Санкова разом з партнерском ґміном зо Словациі, Нижньом Полянком, підписали умову на реализацию проєкту «Вратувати од непамяти». Цілю проєкту єст охорона культуровой спадковины, але тіж зміцніня і розвиток обшыри погранича. В рамках новой інвестициі одновленых буде аж 26 цмонтерів з періоду І світовой войны, 12 на обшыри ґміны Санкова і 14 на обшыри словацкой ґміны. Додатково в проєкті нашла ся думка будовы історичного парку в Сярах. Як повіла для Радия Краків війт ґміны Санкова, Малґожата Малух, в парку найде ся м.ін. макєта вказуюча ґміну разом з зазначеныма цмонтерями і найбільшыма атракциями та м.ін. окопы, што дозволит запрезентувати одвиджаючым, як то выглядало за часів войны. Заплянувано тіж спільны діяня, што мают промувати і утрырваляти памят о жертвах битвы під Ґорлицями. Вартіст цілого проєкту то понад 2 млн зл, з чого 85% то унійне дофінансуваня. Інвестиция буде реализуваня до кінця 2022 рока.

Жубрів в бєщадскых лісах прибыват 

Як каждого рока по зимовым періоді на обшыри цілой державы одбыват ся рахуваня популяциі жубрів. Згідні з досліджынями лісничых на Підкарпатю жыє 719 жубрів, з чого аж 707 прожыват на свободі. Як повіл представник Державных Лісів в Коросні, Едвард Маршалок, то о пару процентів більше в порівнаню до попереднього рока. На тоту хвилю стада жубрів находят ся предовшыткым на обшыри Бєщадів в надлісництвах Блигород – найбільше стадо, Тисна, Команча, Ліско, Лютовиска і Ступосяны, а поєдны звірята вказуют са на погірю на обшыри надлісництва Бірча, Березів та Красічын. Марек Марецкій, заступця директора Реґіональной Дирекциі Державных Лісів підкрислят, же результаты інвентаризациі сут як найбарже докладны зо взгяду на веденый цілорічный моніторінґ стад і єднодньове рахуваня, што дозваалят выелімінувати подвійне порахуваня. Од парох років науковці штораз частійше бесідуют о за великым чыслі популяциі жубрів, што має много неґативных результатів, приміром може быти минулорічный проблем пошырюваня ся серед бєщадскых жубрів телязіозы.

Першый припадок пташачой ґрипы в малопольскым воєвідстві

В Білянці в двох комерцийных ґаздівках, котры занимают ся триманьом домашніх птахів, явили ся припадкы пташачой ґрипы. Як подал в комунікаті воєвідскій лікар ветеринариі, разом в обох ґаздівках трумано коло 6 тис. кур на яйця і понад 10 тис. пуляшів. Одраз по потверджыню хвороты зачали процедуру протидіяня пошырюваню ся ґрипы на інчы ґаздівкы ци дикы звірята. Од понеділька ведена єст утилизация птахів в обох фермах, при котрій бере участ выспециялизувана єдиниця з Ґрупы Азоты. На місци вказали ся тіж поліциянты з ґорлицкой коменды, котры забезпечыли обшыр ферм. Як подал для порталю Gorlice Nasze Miasto лікар ветеринариі Ґжеоґж Кавєцкій, заступця Малопольского Воєвідского Лікаря Ветеринариі, в найблизшым часі в околицях Білянкы ведены будут контролі в ґаздівках та досліджыня обшыри, жебы провірити, ци не находят ся деси дальшы джерела хвороты.

Великодній Ярмак для устяньскых учеників

Рада Родичів при Комплексі Шкіл в Устю Рускым орґанізує Великодній Ярмак. Зо взгляду на брак можливости провести кєрмеш в стацийонарній форміі, як в попередніх роках, родиче рішыли перенести Ярмак в віртуальный вымір. Авкция ведена єст на загальнодоступным, фейсбуковым сайті під назвом Великодній Кєрмеш. Участ може брати каждый, ліцитуючы або передаючы даякы святочны творы. Цілю акциі єст зобрати грошы, жебы мочы купити мультімедияльну таблицю, котра послужыт устяньскым ученикам.