«Слово» – 1-ша неділя Великого посту – неділя, 9.00 год.

Ісус Хрістос приходить до Ґалілеї, де стрічать Філіпа. Говорить йому: Наслідуй мене. Кличе быти його учеником.

Філіп такой іде за Натанаїлом і звістує йому радостну новину: Мы нашли Месію, Хріста, Ісус із Назарета. Но Натанаїл одповідать: Ці з Назарета може быти дашто добре? Але Філіп не пробує даякыма арґументами його пересвідчовати. Він не знав, што йому одповісти на тото. Не знав о тайні втіліня, же Ісус ся справды народив у Віфлеємі і выростав в Назареті. Но говорить йому лем слова: Подь і посмоть. А Натанаїл іде.

Видів тоту запаленость на твари Філіпа. Подумав собі, справды Філіп зажыв дашто велике. Іду і я. А кедь быв ішчі далеко од Ісуса, Ісус говорить: То справды Ізраільтян, в котрім не є фалшывости. Натанаїл чудує ся: Одкы ты ня познаш. Ісус йому говорить, же видів го під фіґовым стромом. На што Натанаїл цілый без себе говорить: Учітелю, Ты Сын Божый і Царь Ізараіля. Но Ісус йому говорить: Лем про тото слово віриш. Увидиш векшы діла.

Днешнє слово і нас позывать ку доброму выхоснованю святого посту. Жебы роблячі правдиве покаяня – метанію – зміну думаня, сьме ся приближыли ку Хрістови. А радость з того стрітнутя із Хрістом на нас будуть видіти і другы. І будуть ся звідовати: Што є причінов той радости і покоя? А тогды і мы можеме повісти, подь і посмоть, і приводити і другых ку Хрістови. Слава Ісусу Хрісту!

В неділю, 21. марца 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 21. марца о 12.00 год. і 22. марца о 2.00 год. за русиньскым часом.