Сумар дня на 18. марця 2021 р.

Приносиме вам сумар медияльной ґрупы ЛЕМ.фм+ на ден 18. марця 2021 р.

Трохановскій і о. Дубец оцінены

Вчера, 17. марця, в Ґалицийскым Місточку в Новым Санчы переданы были оцініня для двох осіб, якы діют на благо лемківской культуры. Нагородженый был єден з найвыдатнійшых лемківскых поетів і діячів Петро Трохановскій (Мурянка), якому передано оцініня малопольского воєвідства – ІІ нагороду ім. Романа Райнфуса. Премію отримал тіж православный священник з Ґорлиц, о. Роман Дубец, якому вручено выріжніня нагороды малопольского воєвідства ім. Марияна Корнецкого. Петро Трохановскій народоженый был за выдатны і вынятковы осягніня в обшыри плеканя локальной культуровой достоменности в Малопольщы в 2020 р. В лявдациі до нагороды написано, што Петро Трохановскій веде активну соспільно-культуральну і педаґоґічну діяльніст для ратуваня і розвитку культуровой спадковины Лемковины. Окрем того єст редактором лемківскых выдавництв, дириґентом та єдным з думкодавців і реализаторів першых Лемківскых Ватр в Горах, закля імпреза была орґанізувана як патріотична, лемківска культурально-освітня подія. Окрем грамоты, лавреат отримал тіж фінансове спертя. Вчас стрічы выріжніня нагороды ім. Корнецкого отримал і о. Роман Дубец за за выдатны осягніня в обшыри охороны і опікы над памятниками деревяной архітектуры Малопольщы. Обі нагороды вручыла в імени маршалка членкыня заряду малопольского воєвідства Івона Ґібас. Ґратулюєме лавреатам!

Збірка на поміч вірным мукачівской грекокатолицкой єпархіі

Минулого рока Місийне Общество св. Вікентия де Поль на Словациі зорґанізувало збірку на поміч найбіднійшым в мукачівскій грекокатолицкій єпархіі. На тот замір был зрядженый банковый рахунок, котрый отримал назву Фонд владыкы Міляна, в памят недавно помершого єпископа мукачівского Міляна Шашіка. Уж штырі місяці по смерти владыкы, котрый великыма буквами записал ся до істориі і розвитку єпархіі, в листопаді/новембрі 2020 р. владыка Ніль Лущак, апостольскій адміністратор мукачівской єпархіі, принял дар в сумі 40 тис. евро од орґанізаторів фонду в єпископскій резиденциі в Ужгороді. Початком марця тр. апостольскій адміністратор перевзял другу част той збіркы в сумі понад 5 тис. евро. Владыка Ніль з той нагоды переслал і короткє відео, в котрым дякує за тоту фінансову поміч. Як припомнул провінциял вікентиянів на Словациі, збірка была оголошена до кінця календарного 2020 р. Грошы будут переданы для найбіднійшых вірных і священнослужытелів мукачівской грекокатолицкой єпархіі.

Енді Варголь в Бруксели

Приватна ґалерия NooNConsultinG ART під покровительством Амбасады Словацкой Республикы в Бруксели одкрыла выставу посвячену творчости найвеце знаного в світі Русина – «Енді Варголь і розведеный ґлютамат натрия». Вернісаж прошол 13. марця. Артистичный проєкт был зорґанізуваный і кураторуваный через іспаньскє Désirée Meza-Mesía во спілпрацы м.ін. з Mazzoleni Foundation з Миляна. Італийска фундация выпожычыла веце як 40 ориґінальных творів Варголя на потребы експозициі. При орґанізуваню подіі єй реализаторы за посередництвом Амбасады Словацкой Республикы в Вашынґтоні контактували ся з братанком Енді Дональдом Варгольом, так само спілпрацували з Музейом Енді Варголя в Меджелабірцях. На вернісажы запрезентували відео, в котрым омовлены были квестиі звязаны з языком, культуром і походжыньом Енді. Выстава творів Варголя в NooNConsultinG ART і єй контекст сут вынятковы, бо проходит она як раз в 40. річницю презентуваной в Бруксели леґендарной спільной експозициі Енді Варголя та бельґійского сурреалистичного маляря Поля Дельво. На експозициі вказуваны сут непопулярны ґрафікы Варголя, часописы, офсетовы друкы і розмаіты предметы звязаны з жытьом і творчістю Варголя. Цілю выставы є вказати мало знаны аспекты жытя короля поп-арту, якы мали влияня на його творчіст.

Свидницкій інтернет

Mісто Свидник на Словациі удоступнило своім жытелям шырокопасмовый інтернет за посередництвом выбудуваня безплатных WiFі зон. Уряд міста, котрый має амбіцию быти про кажду вікову катеґорию, долучыл до проєкту на побудуваня приступовых пунктів інтернету про домашніх і туристів. На выбудуваня пунктів безплатных WiFi зон місто Свидник здобыло дотацию 14,250 евро і в тых днях было одкрытых 10 приступовых пунктів в рамках цілого міста. На публичных леніях посылят ся інтернет зо скорістю мінімально 30 меґабітів за секунду.