Варголь в Бруксели

Приватна ґалерия NooNConsultinG ART під покровительством Амбасады Словацкой Республикы в Бруксели одкрыла выставу посвячену творчости найвеце знаного в світі Русина – «Енді Варголь і розведеный ґлютамат натрия». Вернісаж прошол 13. марця.

Артистичный проєкт был зорґанізуваный і кураторуваный через іспаньскє Désirée Meza-Mesía во спілпрацы м.ін. з Mazzoleni Foundation з Миляна. Італийска фундация выпожычыла веце як 40 ориґінальных творів Варголя на потребы експозициі. При орґанізуваню подіі єй реализаторы за посередництвом Амбасады Словацкой Республикы в Вашынґтоні контактували ся з братанком Енді Дональдом Варгольом, так само спілпрацували з Музейом Енді Варголя в Меджелабірцях.

На вернісажы запрезентували відео, в котрым омовлены были квестиі звязаны з языком, культуром і походжыньом Енді. Дипломата з амбасады Андрей Міхалец, присутный на отвертю, доцінил творчый замір орґанізаторів выставы, жебы зосередити ся на коренях артисты. Сам тіж повіл пару слів про походжыня Енді та про ціліст колекциі Музею Енді Варголя в Меджелабірцях і про його ініциятора, історика штукы, Михала Бицько. Подякувал так працівникам ґалериі NooNConsultinG ART за спілпрацу, як і представникам Mazzoleni Foundation за пожычку образів. Додал, што хоц обставины сут тяжкы, то вірит, же выстава притягне вельох одвиджаючых і буде позитивні одобрана експертами і публиком.

Выстава творів Енді Варголя в NooNConsultinG ART і єй контекст сут вынятковы, бо проходит она як раз в 40. річницю леґендарной спільной експозициі Енді Варголя та бельґійского сурреалистичного маляря Поля Дельво презентуваной в Бруксели. Теперішня выстава презентувана єст в особливым місци. То забытковый індустрияльный будинок в Бруксели, котрый был фабриком картону. Одновили го подля проєкту культового бельґійского архітекта Бруно Ерпікума. На експозициі вказуваны сут непопулярны ґрафікы Варголя, часописы, офсетовы друкы і розмаіты предметы звязаны з жытьом і творчістю Варголя. Цілю выставы є вказати мало знаны аспекты жытя короля поп-арту, якы мали влияня на його творчіст.

Фот. за: mzv.sk