Свідник од зачатку року минув уж 21 тісяч евр в повязаню з пандемійов

Місто Свідник минуло од зачатку року на протипандемічны рішіня і тестованя на хвороту COVID-19 приблизно 21 тісяч евр. Грошы, котры місту має рефундовати держава, хоснують наприклад на накупліня респіраторів.

„Дотримуєме в місті вшыткы гіґєнічны наряджіня, школы затля зохабляме отворены,“ повіла про аґентуру TASR пріматорка міста Свідник Марцела Іванчова з тым, же условія в школах ставають стогішыма.

„Ідеме до дезінфекції, такой як то погода дозволить. Вшыткым жытелям старшым як 65 років сьме накупили і роздістрібуовали респіраторы,“ інформовала Іванчова.

Свідник є в бордовій зоні на мапі Словакії, люде там потребують каждых сім днів резултат антіґенового тесту. „Кедьже не каждый має можливость дати ся отестовати почас тыждня, або ся не дістане до сістемы обїднавок на тест, зряджуєме і надалше нашы місця на тестованя.“ Подля пріматоркы то складна задача, бо місто не має одділіня крізового ряджіня і так цілу орґанізацію тестованя забезпечують урядници, котры почас тыждня роблять на містьскім уряді свою звычайну роботу і через вікенд забезпечують то, што треба ку тестованю.

Цілковы вытраты на протипандемічны крокы включно тестованя суть про місто од зачатку року приблизно 21 тісяч евр.

„Што дотулять ся наприклад накупліня респіраторів про жытелів, намагаме ся купити їх з дотації од державы, котру дістанеме на мобілне одберове місце (місце тестованя, позн. ред.). То значіть же і мобілны одберовы місця маме намагу робити барз економічно так, жебы сьме не доплачали з розрахунку міста. Не каждый вікенд ся то подарить,“ пояснила пріматорка.

Свідник нукать і можливость накупліня потравин, гіґєнічных потреб, ці забезпечіня ліків про сеніорів над 65 років, і про здравотно зневыгодненых жытелів. Каждый, хто поміч потребує, може обернути ся на містьскый уряд.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА