Обзерач Природы #24 – пятниця, 13.00 год.

Сердечні просиме слухати природничый проґрам на антені ЛЕМ.фм уж в найблизшу пятницю, 12. марця 2021 р., о 13.00 год. «Обзерач Природы» то пропозиция для любителів природы, лісовых звірят, вандрівок в незнане.

В найблизшым одтинку проґраму призриме ся темі так інтересуючій, як і рідко подаваній в медиях. Дознаме ся, кілько докладні жыє дикых звірят на польскым Підкарпатю. Бесіда буде про чысло медведів, рысів, волків, лишок, дикых котів, кун, бобрів, борсуків, бажантів, заяців, куропатв і іщы парох інчых. Такы рахуваня ведены сут реґулярні і роблят іх працівникы надлісництв і клюбів полювачів. Даны, якы будут подаваны в проґрамі, походят з остатнього рахуваня в 2019 році і тыкают ся обшыри підкарпатского воєвідства. Якых звірят маме більше в підкарпатскых лісах, а якых жыє уж штораз меньше? Ци ґлобальны зміны климату мают даякє влияня на місцеву фауну і появляют ся в нас новы, скорше незнаны ґатункы дикых звірят? На тоты вшыткы звіданя познате одповіди уж неодолга, в пятницю о 13.00 год. Будте з нами!

Проґрам веденый єст Якубом Зиґмунтом, ґеолоґом і пасийонатом гірскых вандрівок. «Обзерача Природы» мож слухати в кажду пятницю о 13.00 год., а повторіня авдициі будут емітуваны в середы о 10.00 год.