Наша памят – «Говорить Пряшів» – пятниця, 18.10 год.

Сонце днес высоко, гріє нам, окрыват цілу Лемковину золотыма променями. Як раз і я мам тото щестя, што днешній заклик до вас пишу з єдного з підґорлицкых рускых сел. Гардый ден – тота пятниця, 26. лютого/фебруара 2021 р.

Лем єдно не сходит з памяти. Днес річниця народжыня нашого долголітнього шефредактора, а радше – долголітнього камарата – Богдана Ґамбаля (1965-2020). Жаль, што уж од даякого часу, што го даном датом 2. липця/юлия 2020 р. годны сме означыти, як смутна, болістна дата для лемківской громады, фурт бесідуєме уж про Богдана в минулым часі. Так уж буде. Треба нам звыкнути. Треба нам сой з тым порадити, як зо вшыткым в жытю. Но лем наша спільнотова памят – радийовців, люди, што радийо люблят, але і люди культуры, люди пера, інтеліґенциі і народу – то памят, яка буде вічна, кєд споминати будеме каждого рока в нашым календари на вызначных Лемків.

Просиме зато, кєд днес залучыте о 18.10 год. тот же премєровый «Говорить Пряшів», спомнийме хвильком на покійного Богдана Ґамбаля. Він же, іщы коли мене в тото не втягнул, сам рыхтувал заявкы премєровых авдиций з Пряшова. Любил тото місто, любил пряшівскых Руснаків, такых твердых, кріпкых, такых завзятых як фрас… «Говорить Пряшів» то был його проґрам, так днес, в першу річницю народжыня по смерти – думайте на того, што перше лемківскє радийо выплекал.

Просиме слухати.