«Голосы Русинів Підкарпатя» – середа, 18.10 год.

Гостьом днешнього нашого проґраму буде Василь Ковач, котрый прямо не діє в русиньскім русі на Підкарпатю, але бізовно є локалным патріотом і представительом той свідомой части русиньского жытельства Підкарпатя.

А на вопрос як пришов ку русинству одповідать: «Я ся не лем русинством інтересую, в мене є много різных гобі, але то є моє родне, і каждый порядный челядник має в першім ряді выяснити, хто він є і з чого ся складать, а вже пак мож штось другоє рішати.» Такы екзістенціалны темы днесь і будеме обсуждати з нашым респондентом. Розговор ся записовав через аплікацію Skype.

Ключовы темы інтервю:

• Приход Василя Ковача до русинства
• Ключовы одлишности меджі Українцями і Русинами з погляду Василя Ковача
• Роль інтернету і печатаных публікацій в розвитку етнічной самоідентіфікації Василя Ковача

Василь Ковач народив ся 7-го августа 1983-го року у русиньскій родині в селі Золотарьово, што на Хустщіні на Підкарпатю. Родічі были простыма робітниками: отець ходив цілый жывот на заробіткы, а мама робила в товарні. Є старыш сыном, із сестров ся выховльовали бабков і прабабков. В родині десь на підсвідомій ровині знали і розуміли, што они суть Русинами, але наголос про то ся не говорило (із слов В. Ковача).

Спомнать респондент: «Першый раз ся мі до рук дістала русиньска публікація, кедь єм мав девять років, была то новинка од Івана Петровція. До днесь памятаю як єм направду быв зачудованый, же так просто по нашому мож писати, а не лем бісідовати.»

Повну середню освіту, а то єденадцять клас, здобыв в роднім селі. Наслідно у віці 17 років пішов ся учіти за правника, наперед до Івано-Франківска, так до Києва. Чотыри рокы свого жывота провів у Києві, де почас штудій стрічав різной етнічности людей, і так ку ньому приходило шырше розуміня контексу хто він є. А з інтернетом цалком новый світ ся одкрыв, бо за молодости быв зведавый і жадав інформації, але тых не было в публічнім доступі.

По высокошкольскых штудіях ся вернув домів і почав ся бівш актівно інтересовати русиньскым вопросом, перечітуючі історічны книжкы і знакомлячі ся з різныма русиньскыма діятелями на Підкарпатю і за його граніцями. І до нашого радіа і порталу так само ся озывав. На даный час із женов жыють і выховлюють двоє діточок в місті Берегово, Підкарпатя.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА