Сумар дня на 24. лютого/фебруара 2021 р.

Приносиме вам сумар медияльной ґрупы ЛЕМ.фм+ на ден 24. лютого/фебруара 2021 р.

Заатакували провідника по церкви в Поворознику

В вікенд дошло до неприємной ситуациі в церкви св. Якова в Поворознику. Провідник по храмі был вдареный в лице, бо попросил штырьох туристів, котры ввошли до святыні, заложыти масочкы. Туристы не хотіли достосувати ся до обовязуючых переписів і рекомендаций провідника, котрый поінформувал, што буде змушеный задзвонити на поліцию. Коли вышол перед обєкт, єден з мужчын вытрутил провідникови телефон, а пак так міцно вдарил в його лице, што розтял го до кырви. Вшыткы туристы втекли. Глядат іх тепер поліция.

Глядают місця на памятник бывшого міністра середовиска

Памятник Яна Шышка, бывшого міністра середовиска, на внесок Фундациі для Незалежной мал явити ся в Высовій. По публикациях о тым, на ґміну Устя Рускє пала велика критика, а люде зачали чысленні підписувати ся під петицийом проти тій думці, в звязку з чым війт ґміны Збіґнєв Людвін лишыл внесок фундациі без дальшого розсмотрюваня. Фундация для Незалежной, ініциятор акциі, глядат єднак дальшого місця, жебы поставити близко 2-метровый памятник бывшого міністра. Під увагу браных є пару інчых локализаций, тіж в Малопольщы. Покля што не знатя, якы конкретні. Фундация для Незалежной была основана в 2018 р. Єй думкодавцьом є Ян Косьоровскій, директор Державных Лісів в Кракові. Ян Шышко до січня/януара 2018 р. был міністром середовиска. Будучы на становиску, выкликувал вельо емоций, критикували го м.ін. за вытинку дерев з Біловежскій Пущы.

Одзначено о. прот. Петра Павлище

Грекокатолицкій митрополитa перемышльско-варшавскій архієпископ Євгеній Попович нагородил протоєрея Петра Павлище почестном грамотом за сумлінне выполняня душпастырскых обовязків та з нагоды 20-літя священства. О. прот. Певлище є краківско-ґорлицкым деканом, парохом парохіі Воздвыжыня Св. Креста в Кракові. Святу Тайну Священства одобрал з рук архієпископа Йоана Мартиняка 17. лютого/фебруара 2001 рока в Пасленку.

Лявины на Церговій

Сніговы лявины зышли по убочах Церговой коло Дуклі. То барз рідкє явиско в Низкым Бескіді. Нотуване є практичні лем на спомненій горі, єй пілнічны убочы сут барз обырвисты. Ратівник Бєщадской Ґрупы ҐОПР Домінік Яґєла, підлісничый з Дуклі, повіл, што того рока в парох місцях появили ся чысто великы дошковы лявины, котры можут быти загорозом для вандруючых жолтым шляком. Ратівник остерігат, жебы не зближати ся до сніговых звісів, утвореных на Церговій феновыма вітрами. Для вандруючых верхом горы іх видок то велика атракция, але можут быти небезпечны. Цергова є популярным місцьом експедиций тіж зимом. З вежы на вершку розтігат ся панорама части Лемковины, а при добрій хвили мож видіти Бєщады і Татры.
Курсы пасажерском шыфом по резервуарі в Климківці можут стати ся новом атракцийом аквену уж в часі найблизшых вакаций. Пару років тому плывала по резервуарі шыфа, але зо взгляду на невеликє заінтересуваня курсы по єдным сезоні зникнули. Війт ґміны Ропа Кароль Ґурскій поінформувал, што нашол ся підприємця, котрый хоче урухомити получыня на озері в Климківці. Мали бы быти доступны 2-3 вакацийны місяці. Додал, што вельо буде залежало од пандеміі коронавіруса – тяжко днес повісти, якы ограничыня будут обовязувати літом.

Фот. Радослав Дрожджевскій, www.commons.wikimedia.org