Сумар дня на 23. лютого/фебруара 2021 р.

Приносиме вам сумар медияльной ґрупы ЛЕМ.фм+ на ден 23. лютого/фебруара 2021 р.

«Разом ци окремо?»

Центр Діалоґу Медже Реліґіями і Народами просит на Медженародну Наукову Конференцию «Разом ци окремо?». Конференция посвячена єст темі вельокультуровой коеґзистенциі населіня Бєщадів і Низкого Бескіду до кінця ІІ світовой войны. Стріча пройде на плятформі ZOOM в днях 25.-26. лютого/фебруара. Языками конференциі сут: польскій, анґлицкій і украіньскій. В проґрамі стрічы находит ся сім панелів посвяченых істориі і жытю Русинів, Погірян, Замішанців, Долинян та Ромів, Жыдів, Німців і Поляків. В рамках стрічы будут дискутуваны темы реляций і споминів, што тыкают ратуваня Жыдів, але тіж выселінь проходячых вчас акциі «Вісла» і порожніх сел в саноцкым повіті. На закінчыня заплянуваня єст дискусия і концерт псальмів співаных через Павлину і Шымона Статечных.

Малопольскы Капличкы 2021

Тырват конкурс до проґраму Малопольскы Капличкы 2021. Єст він направленый на єдиниці територияльного самоуряду в малопольскым воєвідстві, якы піднимают консерваторскы, реставраторскы або будівляны працы при памятковых капличках находячых ся на обшыри малопольского воєвідства. Цілю конкурсу єст сохранити для будучых поколінь вартістны обєкты, што сут важным елементом культуровой спадковины Малопольщы. Капличкы, котры находят ся на приватній обшыри, тіж можут рахувати на одновліня, при спілпрацы властителя з єдиницьом територияльного самоуряду. Обєкты не мусят быти вписаны в реґістер памяток малопольского воєвідства або ґмінны евіденциі памяток, але повинны ся одзначати артистичном та історичном вартістю. Єден внескодавця може зложыти два внескы, але каждый мусит ся односити до інчого обєкту. Максимальна квота дофінансуваня то 25 тис. зл, але не більше як 60% коштів реализациі цілости прац. До внеску треба долучыти лем кошторис робіт і знимкы. Документацию мож складати до 23. марця того рока. До той поры повело ся привернути давный блеск більше як 500 обєктів.

Парк Охороны Фауны Бєщадів возникне в Вільхівци

В Вільхівци в ґміні Чорна возникне Парк Охороны Фауны Бєщадів. Буде він дачым посереднім медже зоолоґічным парком а клініком для звірят. Директор Парку Роберт Ґатзка пояснят, же возникніня осередка має на ціли підперти хворы і потрібуючы помочы звірята, што прожывают в бєщадскых лісах. Буде то тіж нагода, жебы вказувати туристам і одвиджаючым парк проблемы, з якыма стрічают ся звірята, і як ім протидіяти. Парк занимал буде обшыр 5 гектарів і поділеный буде на дві части. В єдній проходила буде регабілітация і реконвалесценция звірят, котры мают шансу вернути до натурального середовиска, і тота част не буде доступна для одвиджаючых. В другій замешкают хворы і несамодільны звірята, котры з ріжных причын не будут мочы вернути до себе, буде то і показова част парку з едукацийныма валорами. Одкрытя осередка для одвиджаючых пройде на зламі липця/юлия і серпня/авґуста.

Гуменьскій каштель в своім давным блеску 

Іщы того рока мают ся закінчыти реконструкцийны роботы при гуменьскым каштели. Як подал аґентурі TASR директор Выгорлятского Музею, де находит ся каштель, Василь Федич, кінцьом 2020 рока завершено роботы при внутрішній фасаді обєкту, был то другій з трьох етапів реконструкциі. Тепер зачне ся третій етап – буде то реконструкция двору ренесансового будинку і єдночасне закінчыня робіт при головным будинку музею. Каштель в Гуменным єст нацийональном культурном памятком на Словациі. Музей завдякы своім атракциям і орґанізуваным івентам каждого рока притігат многє чысло туристів, аж і в добі пандеміі. Серед богатой оферты сут тіж артефакты з русиньского реґіону выжнього Земплина. В скансені, котрый належыт до Выгорлятского Музею, мож видіти деревяны обєкты з русиньскых сел. В музею часто презентувана єст і русиньска культура в формі выстав, проґрамів ци выдаваных публикаций. А од 1989 рока в музею находит ся ґалерия прац Ореста Дубая, єдного з найбарже знаных на териториі Словациі русиньскых артистів.