НАЗ(Ы)ВА(ти)/To Be-Named

Імена, назвиска, НАЗВЫ сут барз важным аспектом нашой достоменности. То нима называме себе і окрисляме, як жыєме і фунґуєме в світі, а тіж спосіб, в якій сме добрі або злі пониманы. Нима сме записуваны, клясифікуваны і реґіструваны інчыма, а наукы при іх помочы дефініюют і катеґоризуют світы, што сут докола нас. Нашы мена несут в собі спадковину дідів, культурове знаня і традициі, а тіж знаня о нашым рідным языку, оддзеркаляют спосіб, в якій заселяме сколонізуваны корінны землі, та деколонізацийны процесы. Мена сут барз особисты, але і при тым барз політичны. Чом так рідко досліджаме, анализуєме і міриме ся з тым, што то значыт НАЗ(Ы)ВА(ти)?

Досліджаючы социяльны і політичны аспекты называня, проєкт To Be-Named старат ся будувати обшыри (по)розумліня медже ріжныма культуровыма ґрупами, інституциями і дисциплінами. Хоснуючы такы понятя, як колонізация і деколонізация, што діют як перунохранник для і так уж деликатных квестий прав чловека і етнічности/рас, хоче до них дойти через інтердисциплінарны і меджекультуровы бесіды та тему доступну для вшыткых: НАЗВЫ. Не лем вшыткы іх хоснуєме і безпосередньо досвідчаме, як выкликуют особисты і соспільны наррациі, ділиме ся нима медже ґрупами і межде ріжныма обшырями наукы, але і называме нима (науково, языково, локальні ітп.) світ. Цілю проєкту єст опрацувати основны методолоґіі медже так дослідниками, як і соспільствами, односячы ся з меджекультурной перспективы до квестиі социяльной справедливости. Метода основана єст на збераню досвіду з першой рукы і анализуваню і синтезуваню го разом з системами поєдных обшыри знань – жебы ліпше зрозуміти, в якій спосіб будуєме або нищыме політичну владу і знаня через называня і катеґоризуваня. Надія і в заанґажуваня вченых в будуваня помостів медже науком а корінныма ґрупами, особливо там, де стыкают ся они завдякы корінным дослідникам.

To Be–Named

Проєкт «To Be–Named: The cultural politics of naming and being named» реализуваный єст в партнерстві з проґрамом «Recovering Voices» Смітсонівского Існтитуту в ЗША, з проєктом COLING (Варшавскій Університет) «Minority Languages, Major Opportunities. Collaborative Research, Community Engagement and Innovative Educational Tools» фінансуваным Европейском Комісийом і «Experimental Humanities Collaborative Network», што спонсорувана Open Society University Network.

В рамках того проєкту досліджаны будут культуровы політикы называня, при єдночасным будуваню зрозумліня медже ґрупами докола процесів звязаных з ідентифікацийом і достоменністю при помочы назв. Просит ся присылати науковы есеі, анализы і творы штукы, што ся тыкают культуровых і політичных аспектів того, якы мена, назвы сут хоснуваны.

Роботы можут быти во вшыткых медиях (звук, фотоґрафія, відео, поезия, малярство, писаный текст, інсталяция, перформенс ітд.), орґанізаторы заохочают креативні заняти ся темом: од науковой концептуализациі і называня світа по языковы анализы, што дадут можливіст видіти культуровы практикы; од політикы назв в публичных просторах і колонізациі і деколонізациі світа (зміны назв улиц і археолоґія і вертаня корінных, первістных звань), по корінну іконоґрафію і практикы называня без слів; а тіж особисты наррациі о тым, як нас самых дефініюют або і не дефініюют імена/назвиска. Орґанізаторы надіют ся на роботы, што мают інтердисциплінарный характер, пак зобраны будут они в публикацию і выставы.

Інформациі о абстрактах і роботах

Пропонує ся, жебы працы тыкали м.ін. політичных аспектів назв (нп. етнічности, расы), корінной методолоґіі, метод деколонізациі і культуровой ревітализациі (нп. топоміны, іконоґрафія, місцевы назвы), або жебы были то особисты наррациі, анализы языковых практик называня і ономастикы ци науковы практикы называня. Абстракты до 300 слів просит ся слати формулярьом до 1. марця 2021 р. в своім рідным языку разом з його тлумачыньом на анґлицкій язык і коротком біоґрафійом, адресом і майльом.

Більше інформаций о проєкті і ініциятиві і контакт до орґанізаторів найдете гев.