Сумар дня на 19. лютого/фебруара 2021 р.

Приносиме вам сумар медияльной ґрупы ЛЕМ.фм+ на ден 19. лютого/фебруара 2021 р.

Містецка Рада в Вілямовицях не змінила схваліня

В середу, 17. лютого/фебруара, Містецка Рада в Вілямовицях бесідувала на тему піднятого в 2019 р. рішыня, якє сопротивлят ся середовискам ЛҐБТ і в наслідстві якого стримано дофінансуваня з Норвежскых Фондів на будову Музею Вілямівской Культуры в высокости веце як 7 млн зл. Лем част присутных оповіла ся за зміном схваліня, зато рішыня не было підняте. Схваліньом мают ся перше заняти комісиі рады. Віцебургомайстер Станіслав Ґавлік оскаржыл дохторкы, якы ся выповіли на стрічы проти дискримінациі негетеронормативных осіб, о маніпуляцию. Подля Ґавліка схваліня никого не дискримінує і не кривдит, а звязане з ним замішаня єст лем політичном справом. Бургомайстер Мариян Треля не занял становиска в справі, а лем выразил надію, што комісиі рады неодолга вкажут своє становиско. Можут одкликати, підтримати або змінити схваліня. Зараз по стрічы, в одповіди на оскаржыня, якы пали вчас сесиі на противляючых ся рішыню Рады, Стоваришыня Вілямівяне опубликувало на своім фейсбуковым профіли лист, якій орґанізация выслала до Містеской Рады в Вілямовицях в минулым тыжни. В писмі Стоваришыня противит ся підтримуваню рішыня, якє дискримінує середовиска ЛҐБТ. Споминат на пробы бесід з радныма о неґативных наслідствах підтримуваня схваліня для меншыновых ґруп, будучых частю ґміны од початку єй істнуваня. Стоваришыня підкрислят, што квестиі тыкаючы выхованя і охороны родины не належат до компетенций Містецкой Рады. Ціле писмо можете прочытати на фейсбуковым профіли Стоваришыня Вілямівяне.

Адаптация будинку на Осередок Підпоры і Активізациі Старшых Осіб

Ґміна Санкова в рамках проєкту «Університет Сеньора» отримала в минулым році дофінансуваня з Реґіонального Операцийного Проґраму Малопольского Воєвідства в высокости 3 млн злотых на основаня і ведіня Осередка Підпоры і Активізациі Старшых Осіб. З проєктовых фондів заплянувано сфінансувати текучу діяльніст Осередка через період 3 років та ремонт і выпосажыня будинку бывшой Основной Школы в Мацині на потребы старшых осіб. Вчера, 18. лютого/фебруара, підписано догваріня на выконаня адаптацийных прац в будинку в Мацині, іх кошт то праві 350 тис. злотых. Догваріня підписала війт Ґміны Санкова Малґожата Малух і Скарбник Ґміны Катажына Рак Ваховска.

Выстава маларства в Старій Ремізі в Высовій

Центр Туристичного і Культурного Продукту Ґорлицкого Бескіду і Ґмінный Осередок Культуры в Устю Рускым просят на нову выставу в Ґалериі «Стара Реміза» в Высовій. Выстава презентує малярство і рисунок Данєля Щербы, жытеля Устя Руского. Артиста в своіх творах часто навязує до лемківской архітектуры, малює хыжы і церкви, нп. з Квятони, Рыхвалду, Устя Руского, Перункы, Ізб ци Біличной. Выставу мож обзерати до 26. марця тр. в Старій Ремізі в Высовій або на інтернетовым сайті Ценрту.

Выбрали нового Патріарху Сербской Православной Церкви

Вчера, 18. лютого/фебруара, в Бельгаді выбрали нового Патріарху Сербской Православной Церкви. Елекцийный собор прошол в крипті церкви св. Савы. Згідно з традицийом, нового патріарху выбрали жребом. Імена трьох вытипуваных кандидатів нашли ся в копертах, а єдну з них пак вытяг з Євангелиі найстаршый монах. 46. Архієпископом Печскым, Митрополитом Бельградско-Карловацкым і Патріархом Сербскым остал Митрополита Загребско-Любляньскій Порфірий (Порфирије).