«Слово» – Закхейова неділя – неділя, 9.00 год.

Ісус Хрістос приходить до Єрихону. Там жыв чоловік, котрый ся звав Закхей. Быв то головный мытарь і великый богач. Він хотів видіти Ісуса, но про малый зрост, вышов на фіґовый стром, бо тамадыль мав переходити.

Як Ісус пришов на тото місце посмотрив горі і повів йому: Закхей подь долов, днесь мам быти в твоїм домі. Він скоро зышов долов і прияв го з радостьов. Но многы з тых, што там были, зачали дудротати, же зашов до грішного чоловіка на гостину. Ісус быв тихо. Они якбы тріюмфовали, же они мають правду, же Ісус не є обіцяный Спаситель. Але Ісус не реаґовав. В тихости ішов до дому Закхея. А Закхей втогды: Господи, половину свого маєтку дам бідным. А кедь єм дакого скривдив верну штири раз веце. А Ісус повів: Днесь пришло спасіня до того дому. Бо і він є сыном Авраама.

Тото слово указує нам, же Ісус пришов на тоту землю спасити грішників. Не одсудив ани того фарізея. Він, коли ся стрітив з Хрістом, його жывот ся мінить. Стрічать ся з абсолутнов чістотов. Видить свою брудоту. А хоче направити свій жывот. Ісус ся не брыдить вступити до брудоты нашого сердця. Є лем на нас, ці йому отвориме своє сердце, жебы Він міг його змінити а повісти: Днесь пришло спасіня до того дому.

В неділю, 14. фебруара 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 14. фебруара о 12.00 год. і 15. фебруара о 2.00 год. за русиньскым часом.