Ровером через погранича – нова стежка і мініятуры церкви

До вересня/септембра тр. буде зреализуваный проєкт Маґурского Нацийонального Парку, завдякы котрому вызначеный буде новый біциґльовый пут через Незнайову, а на трасі зроблят місця, жебы сой дыхнути і одпочати. Возникнут тіж мініятуры церкви.

Маґурскій Нацийональный Парк в 2021 році отримал дофінансуваня на реализацию мікропроєкту пн. «Ровером через погранича – природа, істория і культура на двох колесах». Проєкт нашол ся на списку затвердженых до дофінансуваня в рамках Проґраму Трансграничной Спілпрацы Interreg V-A Польща-Словация 2014-2020. Проєкт буде реализуваный во спілпрацы з ґміном Нижня Полянка на Словациі та ґміном Санкова.

Мініятуры церкви, ремонты крестів

В рамках проєкту буде вызначеный новый роверовый пут през Незнайову, получыт «Винный біциґльовый пут» з роверовым шляком «На стыку культур» (з Ясла до Бардийова). На трасі побудуют елементы малой архітектуры, такы як задашыня, лавы ци стояк на роверы.

В плянах є тіж вознести малы архітектонічны обєкты культуры погранича, а то мініятуры церкви, котры будут поставлены попри фундаментах неістнуючых церкви в Свіржовій Рускій, Жыдівскым, Тихани і Незнайовій. Вздолж інерпретацийной стежкы «Незнайова» выремонтуют придорожны кресты, вымінят іх огороджыня. Окрем выміненого хотят заінсталювати панелі з архівальныма знимками, што представляти будут Незнайову і Свріжову. В заміріню є, жебы стоячы при даным панели (уставленым в выміненых неістнуючых селах), видіти, што можна было обзерати з даного місця.

На закінчыня проєкту буде зорґанізуваный біциґльовый райд з Нижньой Полянкы до Бортного.

Фот. magurskiewyprawy.pl