«Слово» – 31-ша неділя по Сошествії Святого Духа – неділя, 9.00 год.

Ісус Хрістос приходить ку Єрихону, де при дорозі быв сліпый чоловік, котрый там жобрав. Як чув, же множество народа переходить тамадыль, просить ся, што ся діє. Повіли йому, же Ісус Назарян є ту.

Він тогды зачав кричати: Ісусе, Сыну Давіда розмилуй ся надо мнов. Многы го напоминали, жебы быв тихо. Но він кричав іщі голосніше. Ісус ся заставив і наказав го привести. Кедь пришов ку ньому, звідує ся го: Што хочеш? А одповів: провидіти. Ісус му повів: Твоя віра тя сохранила – провидь. Він такой провидів а наслідував Го по дорозі і прославляв Бога.

Днешнє слово указує нам – Ісус пришов на тот світ просвітити темноту, подати світло. Чоловік, котрый є в темноті а хоче выйти на світло, стрічать ся з різныма барьєрами, перешкоджінями. Діавол не хоче, жебы быв чоловік у світлі. Кедь ся але не вздавать, Ісус подавать світло.

Тот чоловік наслідовав Ісуса і прославляв Бога. Так і мы маме, коли зазнаме тото дотуліня Боже, не маме вертати ся назад до старого жывота, але іти за Ним по дорозі Євангелія і дотримованя Божых заповідей, і прославляти Го своїм жывотом. Слава Ісусу Хрісту!

В неділю, 7. фебруара 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 7. фебруара о 12.00 год. і 8. фебруара о 2.00 год. за русиньскым часом.