Учытель Лемковины – Іван Русенко

15. січня припадат річниця уродин найвыдатнійшого Учытеля Лемковины – Івана Русенка – педаґоґа, поеты, писменника, ґрафіка, карикатуристы, журналісты, ілюстратора Лемковины.

Вродил ся Іван Русенко 15. січня 1890 рока в Красній званій інакше Коростенком, а крещений был ден пізнійше 16. січня, ден 19. січня часто неправильні подаваного як ден його народин. По закінчыню ґімназиі в Новым Санчы зачал Русенко писати до ґазеты Лемко. Публикувал гын тематычны вершы, полемічну прозу, коментарі і, очывидні, сатирычны рисункы, коментуючы подіі того часу. Спілтворил тіж лемківскы календарі. Вчас Першой Світовой Войны служыл в авсрто-угорскым війску. Од 1924 до 1945 рока учытелювал. В тым часі тіж ходил по Лемковині, орґанізувал театральны выступліня, до котрых писал сценариі. Записувал народны співанкы, але тіж сам вельо писал. Оповідал ся зреформуваньом лемківского языка, упорядкуваньом го і усталіньом єднакой ґраматычной нормы та єдностайного правопису. Серед Лемків узнаваний є як спілтворця сучасного писаного лемківского языка. В меджевоєнным часі Русенко был актывным членом Лемко-Союза. Хоц был против выселіню Лемків на Совєтску Украіну, сам в 1945 році мусіл лишыти рідну землю. Вмер 10. січня 1960 рока в Украіні.

Русенко як нихто інчий знал переляти на папір тугу і любов до лемківской землі. Писал патрийотычні, писал сатирычні, а што найважнійше, писал свідомо, в опертю о пресвідчыня о одрубности лемківксой культуры з хоснуваньом літературного лемківского языка.

В 2010 році стараньом Стоваришыня Лемків выданий остал збірник творчости Івана Русенка Русенко. Выбране. Найвекша в тым заслуга і робота редактора книжкы – Петра Трохановского. В книжці зобрано парудесят вершів Русенка, байкы, драму Вертем в Карпатах, част прозы, парудесят рысунків і ґрафік, сканы документів з жытя Русенка та нотовы записы музыкы скомпонуваной до творів Учытеля. Тото богате в зміст і важне для каждого Лемка выдавництво можете придбати сой на нашым портали за тым мотузком, або выпочыжыти в Бібліотеці Руской Бурсы.