Сумар дня на 2. лютого/фебруара 2021 р.

Приносиме вам сумар медияльной ґрупы ЛЕМ.фм+ на ден 02. лютого/фебруара 2021 р.

В Тыличы выбудуют нову туристичну атракцию

Тылич то місцевіст находяча ся в ґміні Крениця, на стыку двох Бескідів, Низкого і Сандецкого. В його туристичній оферті сут уж джерела мінеральной воды і лыжный вытяг, а того рока оферта пошырит ся о солянкову інгаляторию. Як повіл для радия РДН бургомайстер Крениці Пьотр Рыба, смотрячы на заінтересуваня і популярніст інгаляториі в Солотвиньскым Парку, мож сподівати ся подібных результатів і в Тыличы. Буде то цікаве дополніня теперішньой туристичной оферты, котре винно притягнути нове чысло одвиджаючых. Будова солянковой інгаляториі зачне ся на яр того рока, але уж тепер тырват етап плянуваня і рыхтуваня материялів. Знатя лем, же буде она менша як тота в Солотвиньскым Парку. Бургомайстер Крениці надіє ся тіж, же неодолга Тылич отримат статус курорту. Така зміна дозволила бы шолтыству Тылич старати ся о дотациі для курортів, а в ефекті піднесла бы туристичну атракцийніст місцевости.

Нова «Маґура» уж доступна

Вышол черговый, першый в тым році номер часопису «Маґура». Прочытате в ним м.ін., ци добрі єст в зимовым періоді кормити птахы і як перед выселіньом выглядало село Жыдівскє, а тіж бесіду з Анном Мархевком – аніматорком реґіональной культуры і інструкторком традицийного ремесла. На послідній страні найдете забаву для діти і дорослых з неочывидным розвязаньом. Часопис «Маґура» доступный єст до побраня на офіцияльным сайті Маґурского Нацийонального Парку. Єдночасно мож тіж придбати друкувану «Маґуру», напримір в сідибі Маґурского Нацийонального Парку в Крампній.

Працы креницкого Никыфора в Нацийональным Музею в Кєльцях

Нацийональный Музей в Кєльцях аж і в часі закрытя рыхтує новы выставы. Як повіл директор музею Роберт Котовскій, зо взгляду на пандемію більшіст выстав была перенесена. Єднак надіє ся, же поведе ся іх запрезентувати того рока. Посеред богатой розпискы тогорічных подій находит ся выстава прац нашого креницкого Никыфора, єдного з найліпшых наівных малярів. Директор музею додал, же буде то добра нагода для одвиджаючых музей ближе познати лемківску культуру. Окрем прац артисты, выставу дополнят знимкы і документальны фільмы.

Музей Лемківской Культуры в Зындрановій і Музей Народного Будівництва в Саноку зас отворены

Од днес зас можна одвиджати музей Лемківской Культуры з Зындрановій. Зо взгляду на безпеку одвиджаючых, на час пандеміі, з оферты музею выключено едукацийны занятя і можливіст обзерати фільмы. Так як скорше, одвиджаня можливе єст лем при захованю санітарных вымогів, треба мати масочку, тримати двометровый дистанс і єст ограничыня чысла осіб. Музей єст одкрытый од віторка до неділі в годинах од 10.00 до 16.00. Од понеділька, 1. лютого/фебруара, можна тіж одвиджати Музей Народного Будівництва в Саноку.

«Приповідкы на кажду пору рока»

Варшавскій Університет во спілпрацы зо Стоваришыньом «Руска Бурса» в Ґорлицях печатали книжку з оповіданями для наймолодшых. «Приповідкы на кажду пору рока» то збірка 28 історий, котры мают вчыти, розвивати вражливіст, уяву діти, а предовшыткым – вказуют они богатство русиньского языка, традиций і культуры. Сут то тексты, котры завдякы вельолітній роботі Петра Мурянкы были публикуваны скорше в інчых выданях – в «Голосі Ватры», «Бесіді» і «Лемківскій Ластівочці». До «Приповідок…» тексты зобрала і списала Варвара Дуць, яка вєдно з Анном Масляном одповідали і за редакцию. Выданя публикациі то част старань, жебы хоронити язык, то нарядя потрібне до того, жебы го вчыти, вказувати нашу лемківску культуру, а завдякы кольоровым ілюстрациям «Приповидкы…» заінтересуют аж і наймолодшых чытачів. На потребы домашньой і шкільной едукациі книжка є до одобраня, по скоршым контакті, в Рускій Бурсі в Ґорлицях.