«Голосы Русинів Підкарпатя» – середа, 18.10 год.

В днешнім выданю представиме вам другу часть інтервю з русиньскым актівістом, зачінаючім поетом і публіцістом з Підкарпатя Мигальом Чикивдьом.

Побісідуєме детайлніше о його приході до русиньского руху на Підкарпатю. А так само розпросиме ся нашого респондента о творчіх планах до будучности.

Ключовы темы інтервю:

• Русинство в жывоті актівісты
• Творчі іншпірації юного поета
• Актуалный стан прорусиньского руху на Підкарпатю

Мигаль Чикивдя народив ся 2-го юна 2000-го року у селі Березникы, што на Свалявщіні, Підкарпатя. Отець цілый жывот по заробітках, і мама робить учітельку в сельскій основній школі. А своє дітинство малый Мигаль провів з прабабков, котра і привила йому любов до «нашой» културы і бісіды. Першый стишок написав як 9-річный по україньскы, «бо де я в тот час міг знати, што я Русин і наша бісіда русиньска, родічі ниґда за жадны націоналны вопросы ани не поднимали розговоры, їм было не до того», – каже сам респондент.

У тінеджерьскім віці почав писати свої першы віршы по русиньскы, што дуже привітали і  учітелі в школі, і родина ся радовала. Вже занедовго, іщі до закінчіня середньой школы, быв выданый першый поетічный зборник Мигаля Чикивді під назвов Сад русиньской поезії (р. 2016). В тім самім році стає членом Свалявського районного Общества Підкарпатьскых Русинів. А у році 2017 вступив до Общества русиньскых писателів Закарпатя. Доробкы автора публікують в русиньскоязычных і україньскоязычных выданях Підкарпатя.

Повну середню освіту, а то єденадцять клас, здобыв в роднім селі. Наслідно в році 2017 пішов ся учіти за еколоґа до Дрогобича (Львівська область, Україна), де і штудує в сучасноти. При штудіях во вольнім часі любить сісти, почітати даяку добру русиньску книжку про іншпірацію.

«Пишу о тім, што ня оточує і видить ся важным моїй позорности, а іщі пишу о вшелиякых каждоденных проблемах і сітуаціях, в тім чіслі і русиньскый мотів так само не забываю», – так характерізує свою творчость сам поет.

В поетічнх зборниках юного поета, а тых є пять, представлена шырока тематічна палета: од інтімной лірікы через соціално-екзістанціалну, і аж до патріотічной лірікы.  До будучности автор ся планує оръєнтовати на веце сучасны мотівы, бо твердить, же треба іти з ногов в час, а по русиньскы мож писати на хоцыякы проблематікы, і він то хоче доказати.

Наприклад, на соціалных сітях Мигаля Чикивді вже можеме почітати його русиньскы тексты на тему еколоґії.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА