Сумар дня на 25. січня/януара 2021 р.

Приносиме вам сумар медияльной ґрупы ЛЕМ.фм+ на ден 25. січня/януара 2021 р.

Дофінансуваня мікропроєктів в Карпатскым Еврореґіоні

Стоваришыня Карпатскій Еврореґіон Польща інформує о рішынях в справі дофінансуваня дальшых мікропроєктів. Вчас засіданя Комітету до справ мікропроєктів, якє прошло 20. січня/януара тр., признано дофінансуваня в высокости понад 616 тисячів евро на 14 внесків зложеных в рамках набору – Охорона і розвиток природничой і культуровой спадковины обшыри погранича. На списку внесків затвердженых до дофінансуваня нашли ся м.ін. мікропроєкты Реґіонального Музею в Пряшові, Ґміны Команча, Коросняньского Повіту ци Бєщадского і Маґурского Нацийональных Парків.

Фонды на будову і реновацию резервуарів в Малопольщы

До 28. лютого/фебруара тр. мож складати внескы о дофінансуваня будовы і реновациі резервуарів малой ретенциі на обшыри малопольского воєвідства. Максимальна част дофінансуваня, якє може покрыти воєвідство, то 80% коштів задачы, а його максимальне чысло то 50 000 зл. О середкы можут ся старати властителі ґрунту під резервуаром, што ся находит в малопольскым воєвідстві.

Комунікат Бєщадского Нацийонального Парку

На інтернетовым сайті Бєщадского Нацийонального Парку явил ся комунікат для туристів. Сильный вітер в горах не сприят туристиці. Вшыткыма путями на обшыри Парку мож ходити, єднак сут они по части вкрыты ледом, а сніжна покрыва може мати од 35 цм аж до метра. Жебы ходити по шляку, треба мати зо собом кыйкы і рачкы. В тяжкых условіях выдолжат ся тіж час переходу трасы. З думком о безпеці осіб одвиджаючых Парк в зимовым періоді, в полониновых зонах замонтуваный был специяльный систем ознакуваня. Выже выжньой границі ліса поміщено табличкы, якы вказуют мапу шляку і специяльні приписаный му номер. В разі выпадку треба задзвонити на номер Гірской Охотничой Ратовничой Службы (GOPR) і подати номер з табличкы. Даст він можніст ратівникам скоро злокалізувати місце выпадку.

Народины гачат в Реґєтові

В Фармі Гуцульскых Кони Ґладышів в Реґєтові пришло на світ першых шіст гачат. То лем початок періоду, в котрым мают ся родити гачата. В тым році має прити на світ іщы 47. Кіньска фарма єст одкрыта, але на коні мож смотріти лем на зимовых загонах вколо стайні. В будучым році плянуваны сут ремонты обєктів, якы служат звірятам. Кєд дозволят фінансы, проведеный буде і ґрунтовный ремонт бетоновой внутрішньой дорогы.

Поконкурсова выстава од Маґурского Нацийонального Парку

Маґурскій Нацийональный Парк просит на выставу прац участників минулорічной 15. едициі конкурсу пн. «Почтова картка з Маґурского Нацийонального Парку», яка ся лучыла з ювілейом 25 років діяльности інституциі. Выстава вынятково проходит в онляйновій формі. Першыраз презентуваны сут вшыткы творы, якы были присланы на конкурс. Ученикы основных шкіл мали задачу створити працы, якы бы заохочували одвидити Маґурскій Нацийональный Парк, через вказаня красы находячых ся там краєвидів, лісів, звірів, памяток істориі. Поконкурсову выставу мож обзерати в сервісі YouTube на каналі Парку.