Сумар дня на 22. січня/януара 2021 р.

Приносиме вам сумар медияльной ґрупы ЛЕМ.фм+ на ден 22. січня/януара 2021 р.

Продолженый термін списуваня на Словациі

Пандемія нового типу коронавіруса приносит і зміны в списуваню жытелів, котре на Словациі має проходити од 15. лютого/фебруара до 31. марця 2021 рока. На засіданю влады Словацкой Республикы, што проходило в середу, 20. січня/януара, схвалили продолжыня терміну асистуваного списуваня. Пропозиция закону, котру приготовил Статистичный Уряд Словацкой Республикы, тепер піде до парляменту. Списуваня жытелів буде на Словациі проходило першыраз вполни електронічно. Люде, котры не будут годны списати ся такым способом самы, можут пожадати о поміч асистентів, котрых буде мало кажде село і місто. Такє асистуване списуваня мало бы проходити в новым терміні, конкретно од початку квітня/апріля до кінця жолтня/октобра 2021 рока. Цілю є не збільшати ризикo заражыня COVID-19 найбарже нараженой ґрупы жытелів.

Гірскы ґміны достанут фінансову поміч

Веце як 200 гірскых ґмін, якы потерпіли в наслідстві ограничынь, маючых на ціли затримати пандемію, достане з Урядового Фонду Локальных Інвестиций фінансову поміч в высокости 1 млд зл. Середкы можут быти схоснувати м.ін. на будову, розбудову або модернізацию туристичной інфраструктуры, як тіж на комунальны інвестициі. Серед бенефіциєнтів проґраму нашли ся м.ін. ґміны ґорлицкого повіту: Лужна, Устя Рускє, Санкова, Ропа, Липинкы, місто Ґорлиці і ґміна Ґорлиці. О поміч для самоурядів з ґорлицкого повіту старала ся ґорлицка старостка Мария Ґубала. Вшыткы ґміны мают отримати обіцяны середкы до місяця од принятя резолюциі Радом Міністрів.

Вмер о. Даниіл Рессетар

В середу рано, 20. січня/януара, одышол до вічности митрат протоєрей Даниіл Рессетар, якій послідні рокы служыл в церкви Христа Спасителя в Гаррісбурґу в штаті Пенсильванія. Отец Даниіл скінчыл Православну Теолоґічну Семінарию Св. Тихона. Рукоположеный на священника был в 1958 році. Служыл в Парохіях Східньой Пенсильваніі як мілітарный капелян Авіяцийных Сил Зъєднаных Штатів Америкы. Был вызначным церковным музиком і співаком. Был гордый з приналежности до лемківского народу. В 2003 році Святый Синод признал му нагороду Святого Невинного (срібрной клясы), а в 2017 році митру. По тым як в 2006 році одышол на емеритуру, дале полнил послугу в церкви Христа Спасителя в Гаррісбурґу.

Карпатскы Стрічы онляйн

Карпатскє Товариство просит до участи в дальшым циклю «Карпатскых Стріч». Стрічы были од років орґанізуваны в варшавскым Музею Землі ПАН, єднак з огляду на пандемічну ситуацию в 2021 році будут проходити в онляйновым просторі. Кажда з прелекций буде анонсувана тыжден наперед на інтернетовым сайті і фейсбуковым фанпейджы Товариства. Стрічы будут проходити в каждый послідній четвер місяця. Перша тогорічна стріча пройде 28. січня/януара о 19.00 год. О деревяных церквах східньогалицийскых Карпат оповідати будут Павел Кусаль і Станіслав Криціньскій.