Сумар дня на 19. січня/януара 2021 р.

Приносиме вам сумар медияльной ґрупы ЛЕМ.фм+ на ден 19. січня/януара 2021 р.

В Бєщадах одстрілят наступных 40 хворых жубрів

Осіню інформували сме о пошырюючій ся серед бєщадскых жубрів хвороті, котра веде до сліпоты. Єдины діяня, якы можна підняти, жебы скоротити терпіня звірят і затримати хвороту, то выелімінувати хворы єдиниці. В жолтни/октобрі Ґенеральна Дирекция Охороны Середовиска выдала згоду, жебы одстрілити 15 хворых звірят. На жаль то іщы не конец, хворота дальше ся пошырює. Як вказали остатні обсервациі, чысло заінфекуваных жубрів росне, а найбільшый прирост видно в стаді, што прожыват в західній страні Бєщадів. З той причыны Ґенеральна Дирекция Охороны Середовиска выдала наступне розпоряджыня, в котрым згодила ся одстрілити аж 40 хворых жубрів з західнього стада. Такы діяня мают на ціли ратувати цілу популяцию. Як подают експерты од ґатунковой охороны, кєд не будут підняти ниякы діяня, то по двох роках ціла популяция складала ся буде зо сліпых жубрів, без шанс на перетырваня. Згідні з актуальныма даныма, в Бєщадах на свободі прожыват 668 жубрів, з чого понад 300 находит ся в західнім стаді.

Нове выпосажыня в єдницях пожарной стражы Брунар і Устя Руского

13. січня/януара в Устю Рускым проходило торжественне переданя технічно-розпознавчого авта та нарядя потрібного до ратуваня жытя і захованя безпекы пожарників при акциях. Закупы зреализуваны были в рамках середків переданых з Фонду Справедливости, котрых диспонентом єст Міністер Справедливости. Вартіст закупленого выпосажыня то понад 202 тис. зл, з чого близко 100% покрыло дофінансуваня. Авто лишыт ся до диспозициі устяньской пожарной стражы, хоснуване буде м.ін. в терені, де не єст потрібне стражацкє авто. Решта нового закупу трафит до єдиниці в Брунарах. В офіцийным переданю нового выпосажыня участ взяли м.ін. коменданты Державной Пожарничой Стражы, надлісничы надлісництва Лося і представникы малопольского соймику і локальных власти. Як повіл війт ґміны Устя Рускє Збіґнєв Людвін, надіє ся він, же нове выпосажыня, а особливо авто, прислужыт ся не лем жытелям ґміны, але – кєд треба буде – та і повіту.

4. едиция лыжных бігів в Кривій одкликана

На сайті Стоваришыня Розвитку Шолтыства Крива явила ся інформация, же тогорічна 4. едиция лыжных бігів заплянувана на 31. січня/януара была одкликана. Як подали орґанізаторы акциі, Стоваришыня Розвитку Шолтыства Крива і Надлісництво Ґорлиці, в звязку з продолжыньом ограничынь звязаных з пандемійом змушены сут одкликати тогорічны бігы. Каждого рока ініциятива тішыла ся великом популярністю серед зачынаючых іздити на лыжах, як і заавансуваных, і притігала многє чысло не лем дорослых, але тіж діти і молодежы. Того рока змаганя в Кривій мали быти єдном з едициі Змагань Аматорів Польщы. Орґанізаторы зазначыли, же сут тіж добры новины, через остатні дни накурило на тільо снігу, же спокійні можна заложыти лыжы і погуляти. Центр Лыжных Бігів в Кривій, хоц закрытый, фурт дбат о зрыхтуваня трасы і пути для любителів лыжных прогульок. Актуальны погодовы условія на трасах од недавна мож обзерати через камеры на сайті «Сніжны трасы», а як доносит сайт ґміны Санкова – в плянах єст замонтувати погодову стацию і публикувати подаваны ньом даны.

Перше того рока засіданя Спільной Комісиі Уряду та Нацийональных і Етнічных Меншын

13. січня/януара прошло засіданя Спільной Комісиі Уряду та Нацийональных і Етнічных Меншын. Засіданя вспілвюл віцеміністер Блажей Побожый. В часі стрічы бесідувано м.ін. о минулорічных осягнінях і перешкодах звязаных з періодом пандеміі, пак зачала ся дискусия на тему дотаций на 2021 рік, котрых цілю єст охорона культуровой достоменности нацийональных і етнічных меншын та захованя і розвиток реґіонального языка. В часі засіданя ведено і бесіду о ініциятивах і думках важных для меншын, такых як рыхтуваня до тогорічного Нацийонального Повселюдного Спису.