Апостол – неділя перед Богоявліньом

Чітаня з Писма святого апостола Павла Тімотейови – зачало 298. (4.; 5-8)

(Сыну Тімотею), будь у вшыткім розважный, зношай пакости, повний діло євангелисты, вірно выповний своє посланя. Бо я уж буду пожертвованый. Пришов час мого одходу. Я (свій) бой добрі бойовав, до ціля єм добігнув, віру єм утримав. Теперь є про мене приготовленый вінець справедливости, котрый мі дасть в даный день Господь, тот справедливый судця. А нелем мі, но і вшыткым, котры на нього з любвов чекають.

(Собор 70 апостолів – 4./17. січня/януара)

Чітаня з Писма святого апостола Павла Римлянам – зачало 96. (8.; 8-14)

Братя, тоты, што жыють тілесно, не можуть ся любити Богу. Но вы не жыєте тілесно, але духовно, кідь у вас перебывать Дух Божый. Але кідь хтось не мать Хрістового Духа, тот не є його. Но а кідь мате в собі Хріста, потім є тіло про гріх мертве, но Дух жыє про справедливость. А кідь у вас перебыват Дух того, котрый воскресив Ісуса із мертвых, ожывить і вашы смертельны тіла через свойого духа, котрый у вас перебывать. Зато сьме тоды, братя, довжны, но не тілу, жебы жыти подля тіла. Бо кідь жыєте подля тіла, та умрете, но кідь духом умертвляте тілесны діла, та будете жыти. Бо тоты, котрых веде Дух Божый, суть Божыма сынами.