Сумар дня на 13. січня/януара 2021 р.

Приносиме вам сумар медияльной ґрупы ЛЕМ.фм+ на ден 13. січня/януара 2021 р.

Выріжніня для о. Романа Дубеца

Схваліньом Заряду Малопольского Воєвідства з 22. грудня/децембра 2020 р. парох ґорлицкой православной парохіі св. Тройці о. митрат Роман Дубец нашол ся серед выріжненых в рамках Нагороды Малопольского Воєвідства ім. Марияна Корнецкого за 2020 рік. Одзначыня признано за выдатны осягніня в обшыри охороны і опікы над памятниками деревяной архітектуры Малопольщы. В поясніню Заряд Воєвідства подал, што о. Дубец веде шыроку діяльніст звязану з консерваторском опіком над памятниками деревяной архітектуры та єст активным аніматором культуры, якій популяризує ідею ожывляня деревяных храмів через орґанізуваня в іх середині артистичных подій. Отец митрат Роман Дубец єст Єпархіяльным Консерватором Перемышльско-Ґорлицкой Єпархіі. Од років опікує ся памятниковыма храмами в Перегримці і Розділю. З особливым заінтересуваньом веде роботы для захованя перед знищыньом кіриличных церковных стародруків. Окрем того єст ініциятором і орґанізатором циклю концертів пн. «Спів з іконом на фоні» та «Бортняньского поворот до Бортного», котрых цілю є шырити в реґіоні красу і розмаітіст церковного співу.

Успішні закінчыли роботы в Климківці

Як подає Уряд Ґміны Ропа і його війт Кароль Ґурскій, без опізнінь повело ся закінчыти вшыткы роботы над резервуаром в Климківці. Роботы тырвали гын послідні два рокы. В літнім періоді были деякы утрудніня. Част обшырi треба было загородити з увагы на великє чысло туристів, але не перешкодило тото в выконаню заложеного пляну. Як бесідує Кароль Ґурскіj, барз вельо ся змінило – зроблено компактовы пляжы, забезпечено набережа, замонтувано освітліня, зроблено стежкы, помост до швартовкы, вознесено цілу інфраструктуру в безпосереднім сусідстві резерувару. Кошт інвестициі то 3,5 млн зл, з чого веце як половина походит з фондів од Евросоюзу.

Грошы в Пряшівскым Самосправным Краю

Пряшівскій Самосправный Край в рамках свого проґраму має до розділіня 4 млн евро. Інформувала о тым Івана Ондріова з Одділіня Комунікациі і Пропаґациі ПСК. Мож ся старати о підпору в рамках трьох проґрамів: Вызва про реґіон, Вызва Председы ПСК і Мікропроґрам ПСК. Ґранты можут складати м.ін. села, міста, церкви, реліґійны общества ци позаурядовы орґанізациі. В рамках проґраму Вызва про реґіон мож старати ся о підпору проєктів біциґльового транспорту і біциґльовой туристикы, підпору одновы культурных памяток UNESCO і народных культурных памяток, підпору будуваня і реконстукциі спортовых ареалів ци підпору підношыня якости в социяльных службах і палиятивній опіці. Внескы можна складати в ріжных термінах в залежности од выбору єдного в трьох головных проґрамів (конец лютого/фебруара або конец марця). Успішны жадателі будут мусіти зреализувати своі задачы до кінця жолтня/октобра 2021 рока.

Проблемы на трасі С3

Водителі поіздів нарічут на ознакуваня при будуваній експресовій дорозі С3 (S3) медже Любіном а Польковицями. Заміст іхати просто, візджают до міста – особливо тоты, котры переізджают тамадиль з інчых воєвідств. Справу скоментувал головный інвестор, значыт Ґенеральна Дирекция Державных Доріг і Автострад. Проблематичный єст зъізд з експресовой дорогы перед Любіном од страны Польковиц – водителі, якы ідут просто, непотрібні зъізджают і візджают до міста. Пресова представничка нижньошлезского одділіня ҐДДДіА Маґдалена Шумята подає, што розъізд є одповідньо скорше ознакуваный, а звекшыня ознакуваня зменшыло бы ясніст введеной орґанізациі руху. Додає, што обовязуюча орґанізация руху є тымчасова, доцільово ознакуваня буде змінене, а выконавця робит вшытко, жебы іщы того рока оддати тот понад 14-км одтинок С3 (S3).