«Слово» – Неділя святых Отців – неділя, 9.00 год.

Неділя перед Рождеством або Неділя святых Отців – така назва днешньой неділі, котра нас уж приближує ку празднику Рождества. Свята Церьков нам давать чітати довгый список імен, почінаючі од Авраама аж по Хріста.

Но зачінать – Книга родства – Ісуса Хріста, сына Дваідового , сына Авраамового. Зачінать наперед Давідом, котрый прияв обіцянку, і так Давід быв частіше на устах Жыдів в одношіню ку приходу Месіїї як Авраам. Жыде часто хосновали тот арґумент, кедь ся вадили з Ісусом – ці не говорить Писмо, же Месія прийде з Віфлеема, одкы быв Давід? Коли євангелиста подав причіну, переходить уж на порядок рахованя в часі.

Говорить о Авраамови, Ісаакови і Яковови аж по царя Давіда. Потім переходить добов царів аж по вавілоьске рабство. А по вавілоньскім рабстві аж по народжіня Хріста.

Видиме ту три періоды в жывоті выбраного народа – доба патріархів і судців. Потім доба царів а третя доба первосвящеників. Тоты добы в історії представляють різны формы політічной авторіты. Патріархы, пророкы – першый період до Давіда. Другый період є час царів аж по вавілоньске рабство. Третій період – час священиків, котры мали доглядати на выповняня закона.

Ани єдна форма сама о собі не приношать хосен. Прото Хрістос приходить маючі в собі тоты три політічны сістемы. Приходить принести покій, але тыж слободу, не тоту вонкашню в собі слободу, але слободу внутрішнью, слободу од гріхів, од страстей.

Тот Його приход, на котрый ся тішыме і ся якнайліпше приготовляме, выжадує од нас рішіня. Прияти Хріста і євагеліє, або його одвергнути. Так нам тото днешнє слово указує, Хрістос буде мати троїтый уряс – пророцькый, царьскый і священицькый. Тыж нам указує, же нияка із тых трьох авторит не приношать хосен, кедь не є рішіня нашой слободной волі. І приход самого Господа, котрого Рождество будеме прославяти, не принесе нам хосен, кедь не буде рішіня нашой волі зробити як Йосиф. Він, котрый мав похыбности, трапив ся, не знав, што думати і хотів тайно прпустити Марію. Но ангел йому говорить: Не бій ся прияти Марію, бо з ньой народить ся Спаситель, котрый ослободить свій народ із їх гріхів. Йосиф, коли рано встав, зробив, як йому ангел наказав.

Так і мы приймиме до свого сердця Спасителя Хріста, жебы ся міг народити і в нашім сердці. Слава Ісусу Хрісту!

В неділю, 3. януара 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 3. юнуара о 12.00 год. і 4. януара о 2.00 год. за русиньскым часом.