«Слово» – Неділя Праотців – неділя, 9.00 год.

Днешня неділя называть ся Недільов Праотців. Хто то были праотцьове? Были то справедливы Старого завіта, котры, хоць не мали євангельскый закон, своїм жывотом його выповнили.

Возьмийме приклад Авела, котрый приніс Богу чісту жертву. Приніс тото, што про нього мало ціну, а тото дарує Богу. Каїм, його брат, приніс то, што попало до рук. Бог посмотрив на дары Авела. Но на жертву Каїна не посмотрив. Авел нас учіть приношати Богу жертву чісту, а з чістого сердця. Другым такы прикладом є Ной, котрый жыв в часі розливу гріха, як потопы. Хоць находив ся в тім окружіню зла, выберать собі добро і вірность Господу. А кідь посмотрив на його вірность, наказує йому поставити корабель, бо прийде погыбель на людство. Він послухав Бога, зробив так, як мав наказане. Хоць люде ся з нього сміяли. Веце вірив Богу як наглядам людей. Тым і нас учіть довіряти Богу і робити подля його слова і тогды, кедь то не є приємне, а треба принести за то жертву і зношати терпіня ці переслідованя.

Далшым такым прикладом суть младенці у Вавілоні. Кедь были поставелны перед рішіня поклонити ся златій скулптурі і остати жыти, а тым переступити Божу заповідь, або не послухати царя не пасти перед златов скулптуров і заслужыти собі од нього смерть, но остати Богу вірныма. Они выберають вірность Богу. А не были збаламучены. Так як Ной, кедь послухав Бога і зробив подля його слова, вышло му то на хосен. Так і они, хоць были і шмарены до розпаленого пеца, перебыли неушкоджены, ани їх волося не было опалене од огня. Они одповіли віров на Боже запрошіня.

В днешнім слові чуєме: Много закликаных, но мало выбраных. Бог кличе каждого, но мало одповідать на тото запрошіня. Святы праотцьове одповіли на Боже запрошіня.

Най приклад і їх віры підкріпить і нас, жебы сьме не были лем закликаны, но і выбраны – тоты, котры рішають ся одповісти віров на Боже запрошіня. Слава ІХСХС!

В неділю, 27. децембра 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 27. децембра о 12.00 год. і 28. децембра о 2.00 год. за русиньскым часом.