Віктор Орбан стрітив ся з ґрекокатолицькыма єпіскопами. Прияв од них Віфлеємскый огень

В пятніцю 18-го децембра 2020-го року стрітив ся мадярьскый премєр Віктор Орбан із найвысшыма представителями Ґрекокатолицькой церькви в Мадярьску. На стрічі были обговорены справы односин меджі державов і Ґрекокатолицьков церьквов.

Участныма были вшыткы трьоми єпіскопи, котрых ґрекокатолици в Мадярьску мають. Делеґацію вів высокопреосвященый владыка Філіп Кочіш, архієпіскоп і метрополіта гайдудороґскый, з котрым были преосвященый владыка Атаназ Орос, єпіскоп єпархії в Мішколці і преосвяченый владыка Авел Сочка, єпарха ніредьгазькый. Мадярьскый міністерьскый председа Орбан прияв од ґрекокатолицькых єпіскопів Віфлеємскый огень.

Премєр подяковав за роботу церькви

На стрічі, на котрій брав участь і Жолт Шемєн, підпредседа влады і председа Хрістіаньскодемократічной людовой партії, обговорили ся і можливости співпраці меджі Ґрекокатолицьков церьквов у Мадярьску і державов. Інформовав о тім Берталан Гаваші, прессекратарь мадярьского премєра.

Віктор Орбан прияв ґрекокатолицькых єпіскопів у зреконштруованім історічнім Кармелітаньскім монастырі в мадярьскій столиці Будапешть. Премєр почас неформалной діскусії оцінив Ґрекокатолицьку церьков, котра робить в Мадярьску велику роботу про родины, про бідных людей, і про укріпліня комуніт. Церьковны представителі зясь подяковали за дотеперішню підпору з боку державы, і за то, же є можлива далша співпраца з представителями Мадярьска.

Єпіскопи подали премєрови інформацію і о своїх планах, меджі котрыма є і обновліня окремых катедралных соборів. Попрощали ся з премєром з надійов, же і в слідуючіх роках будуть годны вєдно служыти народу.

Підтримують і Русинів

Ґрекокатолицька метрополітна церьков в Мадярьску мала за остатніма даныма нецілых 270 тісяч віруючіх. Метрополіта і архієпіскоп гайдудороґскый має резіденцію в Дебрецині. Меджі віруючіма той мултіетнічной церькви, котрой віруючіма суть днесь переважно Мадярі, суть і Русины.

В Дебрецині, центрі метрополії, быв у 2019-ім році вдяка Ґрекокатолицькій церькви  одкрытый Русиньскый дім, котрый фінанцовала мадярьска влада. Моментално ся коло нього будує і русиньска деревяна церьков, на котру дала часть фінанцій самосправа міста Дебрецин, решту має фінанцовати метрополія.

Фото: Пресове одділіня мадярьского премєра.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА